KAPIT: Beduduk ari penanggul arus internet ke enda berapa laju ditu, ngujungka perintah udah ngaga pemutus deka bejalaika pengawa masang Sistem Fiber Optik di pasar Kapit ba pun taun baru.

Sapit Kepala Menteri Tan Sri Datuk Amar Dr James Jemut Masing andal nengah chara nya deka ulih mutarka penanggul arus internet di menua Kapit.

“Penanggul arus internet enda berapa manah sereta kelalu lubah ba pasar Kapit deka tepuar nengah pengawa masang Sistem Fiber Optik ba mengeri tu lalu deka dipejalaika ba pun taun baru (2021),” ku iya.

Masing ke mega Menteri Pemansang Penyangkai Kapal enggau Infrastruktur madah munyi nya maya Nutup Pekit E-Sport PUBG Mobile Tetutup Baleh ke diatur ba Dewan Sri Balleh ditu kena malam Hari Enam tu tadi.

Berebak enggau nya, ku Masing pekara nya uidah dikerandau enggau sebuah serikat peribit.

LANDIK MAIN PUBG…Masing (tiga kanan) nyuaka perais ngagai bala pemenang seraya dikemataka bala temuai ke dipebasa.

“Kami udah berandau sereta baum berundingka penanggul tu. Aku nemu mayuh orang sebana tang patut bisi atur ke manah sereta sistematik dikena ngemujurka pekara tu ke pemaik jemah,” ku tandu Kaban Kunsil Nengeri (Adun) Baleh nya.

Kenu ku iya, pansik silik benung digaga serikat nya lalu projek tu nyengkaum Pasar Kanowit enggau Pasar Song sebedau iya disambung ngagai menua Kapit.

Tandu iya, japai arus internet ke menyana beguna amat ukai semina dikena bemain online baka PUBG tu tang mega dikena bejalaika pengawa rasmi nyengkaum baum, diatu chukup mayuh aum diatur nengah chara dalam video.

Berebak enggau nya, iya meri timbal ke manah bekaul enggau program ngatur pekit main elektronik PUBG nya laban ulih matak raban nembiak ba Kapit ngambi bagi sama bemain.

Ku iya, main nya ulih dikena ngisi maya lepa raban nembiak lebih agi sida enda ulih bejalaika main bukai laban ti diketu ketegal pengerekai pandemik Covid-19 sereta nitihka Atur Pengawa Standard (SOP) ke udah digerah perintah.

Bisi 18 tim ngambi bagi ba pekit nya lalu siti tim diarika empat iku kaban. Pekit ke sepanjai hari nya diatur Komiti Nembiak Parti Rakyat Sarawak (PRS) DUN N.64 Baleh begulai enggau Palan Servis DUN N.64 Baleh sereta Gerempung Main Elektronik Batang Rajang.