KAPIT: Ketegal kelalu arapka dunya berantu sereta ngumbai anak iya bisi kachau antu tajau, siku indu semina beputih mata pengudah anak dara ke agi biak umur kena pasung siku dukun lelaki ke dikearap nemu muru kuasa sitan nya, apin lama ke udah.

Penusah tu nyadi ba sebuah anak sungai ba Batang Baleh ditu.

Ketuai Polis Pelilih Kapit DSP Freddy Bian Stanislaus Bian maya ngenuku ke penusah nya kemari madah, beduduk ari nya saspek ke beumur 34 taun nya udah ditan polis pengudah nerima ripot bekaul enggau penusah nya pukul 1.30 lemai kena 26 Disember tu tadi.

Ku iya, maya pengawa berubat muru antu tajau nya, nembiak indu tu dulu dibai ngagai sungai nya.

“Penusah nyadi maya orang ke ngaga ripot tauka indai nembiak ke beumur 40 taun mai anak indu iya betemu enggau dukun nya laban dikumbai bisi ke kachau antu tajau.

“Lebuh datai ba palan nya, sida bisi ‘miring’ enggau ‘bebiau’ ba tebing sungai seraya muru antu tajau nya.

“Pengudah pengawa nya tembu, saspek mai tudah indu ke diperubat ngagai endur bukai tungga ke ulu sungai lalu madah indai indu enggau dua iku kaban iya enda tau nitih laban pengawa nya enda ulih dipeda orang bukai dikena muru antu tajau ari tubuh indu ke diperubat nya,” ku iya.

Freddy madah, dukun nya nyau beambi ulih masung tudah indu tu maya ke muru antu ke enda tau dipeda orang bukai.

Udah nya, dukun tu lalu nangkan tudah indu nya enda tau madahka ngagai orang bukai nangika penyakit nya enda ulih gerai enti ngelanggar penti pemali nya.

“Taja pia, indu nya nusi semua pekara nya ngagai indai iya pengudah sida pulai ke rumay urung pukul 2 pagi kena 25 Disember tu tadi.

“Bekau ari ripot ke digaga, kami (polis) mujur nyidi saspek urung pukul 3 lemai lalu nangkap dukun ba hari ke sama.

“Tudah indu nya terus dibai ngagai Sepital Sibu ngambika diperesa bala lutur.

“Saspek asal ari Balingian diriman tujuh hari nyentuk 2 Januari tu ila. Kes dipansik nitihka Seksyen 376 Kanun Keseksaan laban dipelaba masung,” ku Freddy.

DSP FREDDY BIAN