KAPIT: Bisi 52 iku udah nerima pampas tanah ungkup tanah direnchah projek sepanjai lapan kilometer Nanga Banjor-Nanga Makut.

Menteri Dagang Dalam Menua enggau Pekara Penguna, Datuk Seri Alexander Nanta Linggi minta peranak meri kerejasama nentuka pengawa melakin jalai lanchar dipejalai.

“Peranak mesti nyikap diri enggau aktiviti ti ulih nyungkak tikas ekonomi rama enggau penatai pemisi ketuai bilik pengudah jalai tu tembu dibelakin ila.

“Bayar ke bukai nya agi diitung lalu pampas tanah deka disua dudi,” terang Nanta.

Nanta mansutka jaku nya rambau Pengawa Nyuaka Chek Pampas Tanah ungkup Projek Sitak Pemansang Ulu Rajang (URDA) Nanga Banjor-Nanga Makut, Katibas, Song kemari.