Pengari rayat mesti pintar bepolitik – Harden

ENGKILILI: Pengari rayat mesti pintar runding dalam bepolitik lalu anang ngira diri empu aja, ku jaku tangkan Menteri Muda Pengintu Pengelantang Komuniti.

Ku iya, penuduk dipegai nya mandat ari rayat ti udah milih sida sebedau tu.

“Nya kebuah, pengari rayat mesti ngemeratka pemansang,” ku iya nyemetak madah.

“Sitak Dun Engkilili ti dipegai penyakal agi begunaka pemansang tang pengilap pengari rayat ngujungka rayat napi penusah.

“Kebuah pia laban rayat nadai nerima agih belanja ninting taun Program Transfomasyen Menua Pesisir (RTP) enggau Projek Mit Pemansang Menua Pesisir (MRP) ari Perintah Sarawak dipegai GPS.

Pia mega, Harden ngelalau rayat anang alah ajum pasal isu ti bejaika rayat laban Perintah Sarawak nyata perintah ti ibuhka pekara diguna rayat ba menua tu.

Program Information On Wheel (IOW) udah diatur ba sitak Dun Engkilili nengah Opis Pemadah (Japen) Pelilih Sri Aman beduduk ari peminta peranak rumah panjai.

Tebal agi, ba program nya rayat udah ngenataika isu pasal jalai ngelawa rumah panjai ke jai enggau patut diseleti.

Beduduk ari nya, Harden udah ngabas jalai San Semanju enggau Ulu Skrang begulai enggau Penulung Injinir Shahbuddin Abu Bakar enggau Aishah Nur Dyana Johari, Jurutera Awam ari Unit Kereja Raya Bagi Menua Sri Aman.

Tuju pejalai ngabas nya laban deka meresa enggau beratika perambu nyeleti jalai ngelawa rumah panjai nya.

Nambahka nya, jalai alun nya beguna amat ungkup peranak ba menua ulu dikena mindah ke bukai enggau ngemansangka sektor betanam betupi.

Sama datai Penghulu Inchang Ancheh, Penghulu Bong Nyuk Fah, Kaunsilor Dandi Timbang, Kaunsilor Semijie Janting, Kaunsilor Edwin Merayong, Kaunsilor Randi Ta’ata enggau raban SUPP Pampang Engkilili.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak