SIMANGGANG: Niat ngempung raban bansa Dayak ti talukka bansa udah nyadi tiang pemun Dayak Bukit Kelingkang (DBK).

Pemungkal DBK, Insol Harry madahka sida andalka diri ulih ngempung raban bansa Dayak ukai semina di Sarawak aja tang mega selampur Pulau Borneo.

Ku iya, kitai ke nyadi bansa asal majoriti nguan enggau diau mendam di menua lebih agi di Tanah Kenyalang tu endang patut beserakup; seati enggau sepenemu ngambi hak bansa ulih ditegi nitihka pematut.

“Enti kaul kitai teguh, kitai deka ulih idup segulai sejalai ba mayuh macham pengawa lebih agi ngaul hak bansa asal di menua tu ke patut ditan.

“Taja kami (DBK) nemu tu ukai pengawa ke muntang sereta senang dikereja, tang kami andalka semengat talukka bansa diri deka mai kitai begempung di baruh siti perabung.

“Sada kitai deka nyarih agi didinga enti sema kitai beserakup, peminta kitai dikeibuh, peneka kitai dikemuning enti kitai endang seati,” ku iya lebuh dirandau Suara Sarawak.

Berindik ari nya ku Insol, besai amat pengandal iya deka meda raban bansa Dayak ulih segulai sejalai baka bansa bukai ke udah dulu nyingkang mansang ke mua mai identiti sida.

Bacha penuh juluk ati enggau pesan Taun Baru 2021 ari DBK ba R4 sehari tu.