SARATOK: Kuing pemansang ungkup taun 2021 enda tau enda dilangkar memanah ngambi semua rayat bela ampit ngasaika pemaik iya.

Sapit Menteri Pengeluar Kuasa enggau Pengeraja Asal, Ali Biju madahka tuju kitai ngelangkar dulu projek enggau program pemansang nentuka nadai sitak menua dikelaung tauka tinggal ila.

Ku iya, pekara tu beguna amat laban kitai mesti bisi tagit ti ulih dijapai bepelasarka perambu belanja ditipak enggau peminta ari renggat baruh.

“Aku dekaka menua Saratok tu maju ari semua sukut; ekonomi rama, infrastruktur pemun, pelajar enggau modal mensia ke menyana.

“Nya alai aku chukup beratka kuing enggau tuju pemansang menua tu ngambi tetangkupka peminta enggau peneka rayat.

“Enti Saratok maju, rayat deka idup lantang lalu kitai ulih nyaup nyungkak tikas ekonomi menua,” ku iya.

Ali ke mega Kaban Parlimen Saratok mansutka jaku nya pengudah ngatur pejalai nemuai basa ngagai Opis Pelilih Saratok ditu, pagi kilah ensanus.

Iya madah, batang pejalai sehari nya endang deka berandauka kuing pemansang Pelilih Saratok begulai enggau Pegawai Pelilih (DO) Harun Mahidi empu, ke mega Chairman Kaban Kunsil Pelilih Saratok.

“Mujur endar randau kami duai tadi (kemari) lebuh bekenangka kuing enggau tuju pemansang ti deka diatur begulai nengah kaul kerejasama rat kededua raban.

“Kerejasama nya beguna endar dikena kitai ngiga jalai enggau chara ngambi ulih mai projek pemansang bepelasarka rayat mayuh agi kitu.

“Taja iya (Haron) baru ngepunka pengawa ditu, tang penemu udah segala, nya kebuah aku andal amat pengawa udah tu muntang sereta gerah agi dikereja,” ku Ali madahka pengandal diri.

Adun Krian nya nyemetak madahka kuing pemansang dikerandau nipakka rambai jaku Opis Pelilih Saratok empu; Saratok Maju, Senang enggau Lantang.

“Aram mih kitai sama nempa Saratok ke maju agi ari semua sukut.

“Selamat Taun Baru 2021, Tuhan merekat semua kitai ngena pengelantang, pengelikun, pengerai enggau penyuman.”

SEPENEMU… Ali berandau enggau Haron pasal kuing pemansang Saratok.