SIBU: Perambu nanam siti agi pentik ba Tembawai Tampun Juah (TTJ) dikena nambahka pentik ke udah ditanam sebedau tu ngambika nyadi sepasang.

Nya entara perambu besai Serakup Seni enggau Main Asal Tajai Sarawak tauka Serakup Tajai Sarawak ungkup Taun 2021, ku Presiden iya, Themotty Jagak.

Ku iya, bala kaban serakup udah ngatur pengawa nanam pentik begulai enggau raban bansa Dayak di TTJ di Segumon, Kabupaten Sanggau, Indonesia dalam taun 2019 suba.

“Pengawa kami tu suba betuaika penyanding penemu serakup tu empu, Datuk Sri Edmund Langgu Saga empu ke alai kami betubuh lebih 150 iku kin.

“Lalu pentik ke ditanam kami lebuh nya Pentik Lelaki lalu perambu kami deka nanam Pentik Indu, ngambika seduai tu sepasang, enda timpang,” ku iya nerang lebuh dirandau Suara Sarawak.

Nambahka nya ku Themotty ke siru agi dikangau Tom, sida deka ngatur road show tauka pejalai merindang begulai enggau kaban serakup Dayak bukai begendang pampat.

Ku iya, tuju pejalai sida nya dikena matak mayuh agi bala ke deka enggau nempa rikod ba Malaysian Book Of Record (MBR) Begendang Pampat berambaika jaku Seribu Gendang Seribu Minit.

Nitihka perambu asal program nya diatur bulan June tu tadi tang dilanjar ketegal pengerekai igi penyakit Covid-19.

Deka nemu perambu penuh Serakup Tajai Sarawak tau bacha ba lambar R5 sehari tu.