SARATOK: Geran Projek Mit Pemansang Menua Pesisir (MRP) entara inisiatif pengari rayat ngerumban pemansang renggat baruh.

Sapit Menteri Pengeluar Kuasa enggau Pengeraja Asal, Ali Biju madahka geran nya udah mayuh ngemujurka projek pemansang infrastruktur pemun.

Ku iya, tu nyengkaum pemansang ekonomi rama peranak rumah panjai kelebih agi ungkup Komiti Pemansang enggau Pengelikun Genturung Pendiau (JKKK) enggau Gerempung Indu sida.

“Ba aku, MRP tu ngemuntangka pengawa kitai ngagihka belanja pemansang ke kurang ari RM100,000.

“Peminta ke datai ba kitai deka diperunding dulu, beratika penyampau belanja ke patut dikemendar ngambi chukup ke guna sida ngaduka pemansang.

“Pekara tu semampai dikerandauka kami di Palan Servis Komuniti Sitak Parlimen Saratok din nentuka nadai peminta ‘teberayan’ tauka kena tinggal,” ku iya.

Ali mansutka jaku nya rambau pejalai ngabas rayat di Kampung Melango Baru Hulu apin lama ke udah.

Iya madah, tubah projek ke mit baka nyemin tengah laman, ngaga paking, ngaduka jematan gantung, masang tile, nukar atap enggau ke bukai udah digaga ngena geran MRP.

Berita penuh ba Ruai 6 pagila