KABONG: Juluk ati ngaga baru begunan Gerija Saint (St) Stephen di Empayang ditu deka nyadi nyata nengah agih belanja RM100,000 ari Unit Pekara Pengarap Bukai (Unifor).

Sub Deacon iya, Brayun Enggas madahka raban gerija nerima pemeri nya enggau ati gaga.

“Berasai lantang udah nerima agih belanja tu taja penyampau nya apin chukup tetangkupka ungkus ngaga begunan baru gerija.

“Kami udah baum lalu setujuka ungkus ngaga gerija begunaka RM 200,000.

“Taja pia, raban Unifor madah kami ulih nganjung peminta baru enti belanja apin chukup.

“Ari nya kami meri terima kasih ngagai semua lebih agi raban Unifor ke udah nyaup bala kami ngaduka pemansang gerija,” ku iya.

Brayun mansutka jaku nya pengudah ngarika raban gerija nerima chek ari Adun Kabong, Mohd Chee Kadir di Palan Servis Komuniti sitak Kabong, apin lama ke udah.