TRISO: Penumpang entukar ti diasuh bedarat pansut tauka tama ke dalam feri dikearap anang muchau.

Baka nya mega enggau deriba ti diasuh muka cheremin maya pansut tauka tama ke dalam feri.

Ku siku ari raban gawa di pengkalan feri Triso, Lihi @ Lehi Chali, atur ti dipejalai tu engka baru ngagai bala penguna servis nya.

“Taja pia, atur tu udah lama. Semina, ngelama tu atur nya enda dipeduli bala penguna.

“Aku meratika, bisi sida ti ulih nerima enggau ati tebuka, bisi mega ti baka enggai nerima. Tang, atur ti dipejalaika kami tu ungkup pemaik semua orang.

“Taja pan, kami madah ngagai sida enggau jaku ti manah, bisi sekeda mua nyau engkecham chuka.

“Nya alai, aku ngarapka bala penguna nitihka atur ti udah ditetapka tu enggau seruran nitihka jaku raban ti gawa,” ku iya lebuh ditanya Suara Sarawak, kemari.

Iya ti nyadi ketuai gawa bepun ensana ngaku majoriti orang ulih nerima enggau madah atur nya.

“Aku meda, enggau bisi raban gawa baka tu gaya pengkalan feri lebih lanchar sereta likun.

“Aku ngarapka disiplin semua piak mengkang baka selama dikena nyeliahka sebarang penanggul,” ku iya.

Lihi ke tebilang dikangau Haji Siddieq ngaku bala penguna majak milih Jalai Pesisir nyadi jalai dikena sida.

“Tambah mega, ditu udah bisi palan sembiang, agu enggau palan bedaja, nya alai jalai tu kebuah muntang agi dikena bala penguna,” ku iya.