KOTA SAMARAHAN: Bonnyface Ronny pengari ari Bintangor champion dua kategori dalam pekit bibat lengan ba Program Karnival Ngiga Pemain Baru ba Kompleks Lumba Asajaya, kemari.

Pemekit ke baru beumur 16 taun tu nyadi champion kategori junior 18 taun ke baruh lengan kiba enggau senior lelaki baruh 78 kilogram lengan kiba.

Kelimpah ari nya, iya mega bulih penuduk lumur tiga dalam kategori junior 18 taun ke baruh lengan kiba. Iya mujur mai pulai perais dua buah trofi enggau tiga buah hamper.

Nangkan nya, Phang Kong Shyang mega mujur ngeraup dua kategori iya nya senior lelaki atas 78 kilogram lengan kiba enggau senior lelaki atas 78 kilogram lengan kanan. Iya mujur mai pulai dua trofi enggau dua buah hamper.

Bagi kategori indu, champion enggau lumur dua diempu dua iku diri menyadi iya nya Audrella (champion kategori indu lengan kanan enggau kiba) sereta Willomena (lumur dua kategori indu lengan kanan enggau kiba).

Ketuai Pegawai Eksekutif Kaunsil Lumba Sarawak (SSC) Dr Ong Kong Swee madahka, program tu patut diatur ungkup ngiga mayuh agi pelapis baru lumba gusti lengan.

“Nya alai, kitai deka terus komited dalam nentuka lumba tu terus ngerembai enggau ditanka semua piak.

“Kebuah pia, laban kitai begunaka mayuh agi pelapis baru ba jeman ti deka datai ngarika Sarawak enggau nyadi pengari Malaysia ke panggau dunya,” ku iya.

Iya bejaku munyi nya lebuh bejadika Program Nutup Karnival Ngiga Pemain Baru di Asajaya, kemari.

Audrella (champion kategori indu lengan kanan enggau kiba).