MIRI: Mensia mayuh enda ibuh nangi meri darah taja betapi enggau gelumbang ketiga pandemik Covid-19 tang terus mantu ngidupka nyawa orang bukai.

Kaban Kunsil Nengeri (Adun) Telang Usan, Dennis Ngau madah, bedau kala nyadi orang ke meri darah kena rampit penyakit Covid-19 ari salur darah.

“Diatu bedau bisi rikod ari opis pengerai tauka bukti mandangka orang ke meri darah kena rampit penyakit Covid-19 maya sida meri darah, kebuah pia laban pengawa tu digaga endang nitihka Atur Pengawa Standard (SOP),” ku iya maya Kimpin Meri Darah diatur Gerempung Pemberita Utara Sarawak (NSJA), kemari.

Ku iya, bekal darah semampai diguna dikena ngidupka nyawa orang bukai lebih agi pesakit riman, indu ke baru beranak, pesakit raya, orang bebuntas enggau ke bukai.

“Kimpin meri darah tu diperati nyadi sebengkah ari pengawa dikena mensia mayuh bela datai meri darah kelimpah beperesa pengerai,” ku iya.

Tandu Dennis Ngau, pengawa baka tu ukai pengawa ke ulih medis tang iya digaga endang nitihka SOP ke udah ditetap raban arin opis pengerai.

“Pengawa ngelakuka kimpin tu patut suah dipejalai dikena matak mayuh agi mereti pasal pengawa mantu orang bukai,” ku iya.

Dennis madah, nitihka rikod penyampau pain darah udah digumpul sepanjai taun 2020 bisi 8638 pain iya nya nurun 1 peratus (96 pain) dibanding 8734 ba taun sebedau tu.

“Maya betapi enggau kerekai Covid-19, peranak Miri tetap datai meri sukung ngagai pengawa meri darah ungkup Bekal Darah Sepital Miri ke udah kusut 1 peratus ja dibanding 20 peratus ba sepital bukai,” ku iya.

Berebak enggau nya, Dennis mujur NSJA laban udah mujur ngatur program nya dikena mantu sida ke beguna darah.