KUCHING: Opis Menteri Dagang Temuai, Seni enggau Main Asal (MOTAC), nerima langgur penemu ari mensia mayuh ngemasukka kemisi Pengerami Kaamatan enggau Gawai dalam perambu kemisi di semua nengeri di Malaysia.

Pekara nya dipansut beduduk ari timbal ke bisi diterima MOTAC, pasal perambu kemisi ke dibantai ba laman Facebook Tourism Malaysia, nadai ngerintaika kemisi dua iti pengerami nya dalam perambu kemisi menua.

Menteri iya Datuk Seri Nancy Shukri madah, taja pengerami Kaamatan enggau Gawai semina kemisi besai ke dirami ba nengeri Sabah enggau Sarawak, tang pekara ke lebih beguna awakka rayat ba nengeri-nengeri bukai mega nemu pasal pengerami nya.

“Aku udah berundingka pekara tu ari sukut positif, laban nengah chara tu nunjukka pemanah kitai (Sabah enggau Sarawak), penyerakup ke bisi ba kitai nya chukup tegap.

“Orang Sabah enggau Sarawak deka orang luar ari Borneo datai meda enggau mua diri, baka ni daya idup di Sabah enggau Sarawak nengah pengerami nya,” ku iya ba sebengkah aum pemberita ditu, kemari.

Nancy madah nengah pengawa ngeletak kemisi Kaamatan enggau Gawai, nya deka meri peluang ngagai rayat Malaysia merambu kemisi sida, kelimpah nambahka pengaya adat ke bisi ba menua tu nengah bemacham kemisi.

Dulu ari nya, iya madah kemisi dua bengkah pengerami nya nadai disengkaum dalam perambu kemisi besai menua, laban nya endang ungkup kalender Perintah Besai.

“Kemisi Perintah Besai endang ungkup kemisi ke lama lalu mayuh nengeri deka bulih pemaik ari kemisi ke bisi dibaruh atur Perintah Besai,” ku iya.– BERNAMA

RANYAI siti ari kelai pengerami Gawai ke suah dipeda maya pengerami nyambut Gawai Dayak kelimpah ngatur bemacham pekit bukai. Gambar Album