GEDONG: Peranak Gedong dipuji laban seruran ngemeranka ayu penyerakup, ku Datuk Mohd Naroden Majais.

Menteri Muda Dagang Entarabansa enggau Industri, Terminal Industri enggau Pemansang Dagang nya madah, berebak enggau nya peranak ditu mega seruran meri sukung ke manah ngagai perambu program ke bisi dibai ngagai endur tu.

Kenu ku iya, nya alai sekeda projek pemansang ke besai ke dilanggur ba Gedong baka ngaga dua jematan baru deka besambungka menua Gedong enggau Kota Samarahan enda lama agi.

Tambah mega, tinda milih kunteritor bejalaika pengawa nya deka dibuka pun bulan tu.

Kelimpah nya, ku iya perintah nengeri bisi merambu deka ngaga jalai raya baru besambungka Gedong enggau Ulu Simunjan sereta jalai nya deka rembus ba Jalai Raya Pan Borneo di sitak Balai Ringin.

“Semua projek pemansang tu udah dikemendarka Kepala Menteri Datuk Patinggi Abang Johari Tun Abang Openg lalu pemujur projek nya jemah deka nyungkak pemansang ditu, “ ku iya.

Iya madah munyi nya ba mua urung 300 peranak ke nyereta Program Ngena Ensikal Ngeliyun Kampung di Ampiteatre Gedong kemari. Program nya diatur dikena ngerami penatai taun baru 2021.

Naroden ke mega Adun Gedong madah diri temegah meda pemujur program ngena ensikal nya laban pengawa tu nyau majak dikerindu mensia mayuh kelimpah dikena nanggam pemanah kaul enggau pangan diri.

Program Ngena Ensikal Ngeliyun Kampung diatur PBB Zon Gedong. Bela bisi datai Ketuai PBB Zon Gedong Ali Bujang enggau Ketuai Nembiak PBB Gedong, Jamil Abong sereta Penyanding Penemu Nembiak PBB Gedong, Dato Posa Majais.