TRISO: Nyangka enti nadai kebuah besai, nadai siku orang sanggup terejun ke dalam sungai Batang Lupar, taja diberi perais besai.
Kebuah pia, laban sungai nya endang sigi tampak rita nyadi lubuk jagu ti balat dikenakut mensia ba menua tu.

Kelebih agi maya penusah entukar 4WD labuh ke sungai, jeragan feri meda enggau mata iya empu siku jagu mesai sebuah Produa Kancil ngayanka diri enda jauh ari palan nya.

Taja pia, bagi lapan iku bujang berani ti terejun ke sungai nyelamatka sida ti labuh dalam entukar nya, penakut nya udah enda dikiruhka agi.
Enda ngelala jagu, enda peduli enggau pengeruga sereta enda berasai pedis tauka takut.

Pekara ti bemain dalam runding sida maya nya endang deka ngeluarka semilan iku orang ti tepekul dalam entukar nya.

Munyi nya jaku ti dipansutka Ketuai Kampung Triso Awang Mos Sulaiman ti mega sama enggau terejun ke sungai ngangkatka bangkai ari entukar ngagai pengkalan kena Hari Lima tu tadi.

“Nya nyawa mensia, ukai jelu. Maya nya, nyawa sida ngelui ari asai takut ti dikembuan kami,” ku iya lebuh nusi ngagai Suara Sarawak di Pengkalan Feri Triso kemari seraya nunjukka abi bakal ketegal cheremin entukar ti pambar.

Ku iya, tujuh sida ke bukai ti terejun ke sungai maya nya, iya nya Bujang Yakup, Sahrin Bujang, Ahmad Abdullah @ Tuah, Jamil Endong, Taufik Ramli, Man Sulaiman enggau menyadi orang ti labuh Ting Hing Ping.

Nyerita dalam agi iya madahka, Sahrin nyadi lelaki pemadu tumu nurun ke dalam sungai.

“Iya ngena pengering diri nyelam sedalam empat meter nanchang tali ba entukar dikena ngemuntangka entukar nya ditarit ke atas.

“Entukar maya nya tungkup, udah nya lalu disingitka. Maya nya kami meda semua sida agi diau dalam entukar tang udah nadai nemu diri enggau nadai duduk ba palan diri empu.

“Udah nya, kami lalu mechahka cheremin enggau ngeluarka sida siku-siku…maya sida ditarit kami, sida endang nadai ngelala orang agi,” ku iya.

Orang keterubah ti dikeluarka iya nya deriba entukar Ronany Ting enggau orang ti kepenudi iya nya Mohd Mustaqim Mohamad Hamzah.

Maya ti pemadu sinu ba iya lebuh ngangkatka tubuh siku nembiak tauka anak pengkuan Mohamad Hamzah Razali enggau Siti Aisyah Abdullah iya nya Mohd Ahmad ke baru beumur empat bulan.

“Seraya ngangkatka tubuh Ahmad, aku enggau naka ulih nagang ai mata…mensia mayuh ti diau ba pengkalan semua nyabak meda nembiak mit nya udah sulai.

“Tu teladan kami dalam timpuh kira-kira 45 minit ungkup nyelamatka sida, taja pan Allah SWT lebih sayau ke sida.

“Aku ngaku berasai sinu laban tu entara penusah besai kala nyadi dalam sejarah enggau Kampung Triso,” ku iya.

Iya mega meri penyinu ati ngagai ruang bilik sida ti midang enggau ngarapka sida tetap sabar napi penguji.

Berebak enggau nya, semua sida ti bekaul nyelamatka orang ti labuh dibai entukar nya udah narit ati bala penguna media rama.

Mayuh timbal enggau jaku madahka sida nyadi ‘Bujang Berani Triso’.

Ku sida, bantu tu patut dikemegahka.

Enda kurang mega mensia ti besampi ngarapka sida ti mantu tu nerima balas ti sebaka ari Allah SWT.

Empat hari sebedau penusah nya nyadi, cherita bisi madahka sebuah van nyau deka labuh ke dalam sungai nya ketegal penanggul brek.