KUCHING: Pegawai Opis Kereja Raya (JKR) udah dianjung gawa ba semua 12 pengkalan feri ba menua tu berengkah sehari tu.

Pekara tu dipejalai beduduk ari trajedi ba Pengkalan Feri Triso ti nyadi kena 1 Januari tu tadi.

Menteri Muda Pemansang Infrastruktur enggau Palan Penyangkai Kapal, Datuk Julaihi Narawi madahka atur tu nentuka operator feri nitihka Atur Pengawa Standard (SOP) ti ditetapka maya feri beoperasyen.

“Nya alai, opis menteri udah baum begulai enggau Direktor JKR Datu Ir. Zuraimi Sabki sereta pengari ari Kaunsil Sungai Sarawak (LSS) ngambi ngiga chara mutar timpuh panjai pasal pengelemi servis feri ba menua tu kelimpah ngemanah enggau neritka agi atur SOP ke diatu,” ku Julaihi nerang baru.

Nambahka nya ku Julaihi, semua penumpang feri deka diberi jiket pengelikun sebedau nepan feri ti deka diterit diatu nyadi sebagi ari SOP.

“SOP mega mesti dititih lebuh nyual tikit servis geri ti deka dipejalai ba darat sebedau entukar tama ngagai feri dibanding sebedau tu, tikit dijual pengudah entukar udah dalam feri.

“Diatu, semina deriba aja dikemendar dalam entukar pengudah tama dalam feri seraya semua penumpang mesti duduk ba endur khas ti udah disedia,” ku Julaihi nyemetak madah.

Iya madahka semua penumpang deka diasuh bedarat tama ngagai feri enggau sida deka dipatau pengereja serikat operator feri seraya deriba deka dibantu dataika entukar sida udah tama ke dalam feri enggau selamat.

“Taja pia, atur tu enda diterit enti sema hari ujan tang operator mesti nentuka semua penumpang ngena jaket pengelikun enggau brek entukar ditekan,” ku iya.

Nambahka nya, Julaihi madahka semua SOP nya udah dipejalai sebedau tu tang enda diterit nitihka pematut.

“Atur tu ulih diinsur bepanggai ba pemutus pegawai JKR ti gawa ba feri,” ku Direktor JKR Sarawak, Datu Ir Zuraimi Sabki.