KUCHING: Jelai nama dikumbai Pasar Emas Sarawak, Bau nya sebuah pelilih di Bagi Menua Kuching diatu tetemuka ‘emas’ baru ti bisi pengulih nyadi palan pematak ba menua tu.

Sekeda projek udah diperambu ba Bau dalam timpuh 10 taun ke deka datai di baru inisiatif ‘Greater Bau’ nya pelilih penyauh urung 40 kilometer ari Pelilih Kuching.

Perintah udah ngelangkar pelin pemansang dikena matak bala temuai baka nirika Muzium Ngali Emas enggau Taman Bau sereta Tasik Biru Resort Cit ti lama dianti peranak Bau.

Muzium Ngali Emas enggau Taman Bau tu deka nyadi pemungkal ngubah rampa pelilih ngambi nyadi mengeri emas di Sarawak.

Pia mega, perambu tu deka nyadi pemun nyungkak sektor dagang temuai Bau kelebih agi bekaul rampa menua, budaya enggau eko dagang temuai.

Gua Angin entara palan seruran ditapatka temuai lenuh rembus ke pelilih Bau. Pejalai ari pasar Kuching ngagai Gua Angin urung 35km. Pemanah stalagmit, stalagtit enggau pendiau batu ke bisi ba gua tu chukup manding endur ngambi gambar kenang. Nitih penerang pendiau batu nya nyadi baka nya kenyau 60 juta taun ke udah.-Gambar Bernama

Projek Tasik Biru Resort City ti deka dipejalai enda lama agi deka disikap hotel, chalet enggau restoran atas ai, kerita kabel meraka tasik, waterfront ngelingi tebing tasik enggau taman ungkup mensia mayuh.

Semua projek tu deka nentuka pelin pemansang projek muzium udah dipejalai penuh.

Pia mega, projek nya deka nyendiaka palan ngelantangka ati ke ulih matak mayuh agi temuai kelimpah nempa mayuh agi pengawa puang.

MUZIUM NGALI EMAS ENGGAU TAMAN BAU

Adun Tasik Biru, Datuk Henry Harry Jinep madahka Muzium Ngali Emas enggau Taman Bau nya deka nyadi palan pematak baru di pelilih nya.

Ku Henry, sebuah serikat perunding udah dichiri ngambi bejalaika pansik Pelin Besai Pemansang kededua projek nya.

Sebuah rumah tembawai lama bansa Bidayuh ke dikumbai ‘Bori Bak Jorak’, digaga Penghulu ari Krokong Tringgus, Dihoi Nyawen di Krokong, Bau ditu. Penghulu Dihoi bisi ngaga empat buah ‘Bori Bak Jorak’, berega RM4,650 sebuah, ngambika bisi dopeda rebak baru enggau temuai ke bisi datai ngagai pelilih Bau.-Gambar Bernama

Henry mega madahka pansik nya mungkur pasal rampa menua enggau pengelebih pelilih Bau nyadi pasar emas Sarawak.

“Muzium Ngali Emas enggau Taman Bau tu deka nyadi pemun dalam hab pemansang dagang temuai di Tasik Biru.

“Pia mega, mengeri pesaka ke bukai mega deka nerima pemaik ari langgur pemansang tu.

“Pemansang dagang temuai disungkak ari penumbuh Muzium Ngali Emas tu deka nambahka pengawa beranakka puku enggau nyungkak sektor dagang temuai.

“Pekara tu mega deka nyendiaka mayuh agi pengawa puang enggau aktiviti ekonomi ba pelilih tu,” terang Henry.

Gua Fairy siti ari pesaka ke bela manah dilawa bala temuai enti deka raun ke menua Bau.

GREATER BAU

Iya madahka ‘Greater Bau’ ti dipenyadi Kepala Menteri Datuk Patinggi Abang Johari Tun Openg kena 31 Disember tu tadi ukai semina ungkup pemansang pelilih Bau aja tang pemansang mungkur semua kandang menua di baruh Pelilih Bau.

Ngelansa silik, Henry madahka pelin besai ‘Greater Bau’ tu mungkur ari Kampung Lidah Tanah (dalam Batu Kitang), Serikin, Jagoi enggau Singai (dalam wilayah Tasik Biru), Siniawan, Tondong, Buso, Krokong, Pangkalan Tebang enggau Gumbang (dalam pelilih Serembu).

“Kitai mesti bejalaika pemansang mungkur semua kandang menua lalu nya kebuah kitai ngumbai pelin pemansang tu ‘Greater Bau’.

“Pemansang ti deka dipejalai ukai semina ba Pasar Bau aja tang mungkur semua kandang menua di Pelilih Bau.

“Pia mega, pemansang tu deka meri pemanah enggau penguntung ngagai semua raban bansa di Pelilih Bau nyengkaum Bidayuh, China enggau Melayu,” ku Henry.

Ku Henry, Bau enggau Siniawan suba kala nyadi pasar ti dedat tang Bau apin mansang taja bisi sejarah ngali emas pengelama 200 taun berengkah ari taun 1820-an.

“Kebuah pia laban asil pengawa ngali kelebih agi mineral antimoni enggau emas lalu mimit aja penguntung ngagai peranak ba pelilih tu,” ku iya nerang.

“Bisi cherita madahka semina tinggal parit besai aja ba Bau bekau pengawa ngali.

“Nya alai, inisiatif Greater Bau tu dikearap ulih ngubah pasar tu nyadi hab eko dagang temuai ditambah enggau tipan sejarah, budaya enggau adat nyadika produk dagang temuai.

“Pemansang infrastruktur enggau perengkguna moden baka dalam Langgur Pemansang Bau 2016-2030, pemansang Tasik Biru Resort City, Muzium Bau enggau konsep Greater Bau.

“Semua pemansang tu deka meri pemaik besai ngagai peranak Bau enggau rayat Sarawak,” ku Henry nerang pasal Greater Bau.

NYUNGKAK SEKTOR EKONOMI

Nangkan nya, Ketuai Genturung Pendiau Gumbang Atok Derop madahka Pelin Pemansang Greater Bau nya inisiatif ngemansangka agi pasar Bau enggau kandang menua besemak dikena nyungkak aktiviti ekonomi kelebih agi industri eko dagang temuai.

“Nya alai, kami nyukung tegut inisiatif ngubah rampa menua Bau nyadi palan dagang temuai.

“Inisiatif tu chukup manah kelebih agi nyidi sejarah pejalai sida ti ngali emas baka orang China ari Sambas, Indonesia ngagai Kampung Gumbang sebedau nampung pejalai ngagai Bau dalam pun taun 1800-an,” terang Atop.

Atop minta Opis Menteri Dagang Temuai, Seni enggau Main Asal Perintah Sarawak enggau Perintah Besai berundingka inisiatif ngemansangka produk eko dagang temuai di Kampung Gumbang.

Ku Atop, inisiatif tu besai reti kelebih agi pengawa nyidi tipan sejarah pasal sida ti ngali emas ditu.

Berebak enggau nya, siku Perunding Rampa Menua, Burhanudin Abu Bakar andalka penumbuh Muzium Ngali Emas enggau Taman Bau nya deka nyadi palan mandangka endur bukai ke narit ati temuai ba pelilih tu.

“Bau deka nyadi pasar ti ulih matak mayuh agi temuai ke Sarawak,” ku Henry nyimpul randau.-BERNAMA.