KUCHING: Servis feri ti ngaul jalai pesisir dalam Sarawak deka nadai agi enti semua tujuh buah jematan di menua tu udah tembu digaga ba taun 2025.

Kepala Menteri Sarawak Datuk Patinggi Abang Johari Tun Openg madahka, pengawa ngaga enam projek jematan iya nya Jematan Paloh, Jematan Batang Lassa, Jematan Sungai Krian, Jematan Saribas, Jematan Kemena enggau Jematan Rambungan udah berengkah digaga nengah agih belanja ti udah disediaka.

“Semina projek Jematan Batang Lupar aja agi bedau berengkah, tang agih belanja udah disediaka ke alai proses ngiga tender udah dibuka.

“Jematan Batang Lupar engka digaga dalam timpuh empat taun lebih laban jematan nya pamadu panjai di Sarawak iya nya lima kilometer,” ku iya.

Abang Johari bejaku munyi nya ba aum media pengudah bejadika Program Nasih Tanah Projek Rayat Ngaga Balai Lumba enggau Mensia Mayuh sereta Hab Inovatif Batu Kawa ditu, pagi tadi.

Ku iya, semua projek ngaga jematan tu nelan ungkus belanja RM5 billion lalu semua ungkus belanja tu disediaka Perintah Gempung Parti Sarawak (GPS) empu.

“Kebendar endang Perintah Nengeri deka ngembuan siti sistem komunikasyen jalai alun ti nadai ngena servis feri kenyau pegai Niang Datuk Patinggi Tan Sri Adenan Satem suba.

“Nya kebuah, kitai ngaga Jematan Batang Lupar ba baruh sempekat agih belanja entara Perintah Besai enggau Perintah Nengeri 50-50.

“Kitai endang nyemetak deka semua jematan di menua tu bebas tol, tang kita lebih nemu nama ti nyadi (projek Jematan Batang Lupar, Jematan Batang Igan enggau Jematan Batang Rambungan dikinsilka Perintah Pakatan Harapan),” ku iya.

Abang Johari madahka, perambu deka ngemaduka servis feri udah lama diperambu Perintah Sarawak lalu nya ukai diperambu lebuh penusah bebadi ti nabanka semilan nyawa ba Feri Triso nyadi apin lama.