KABONG: Gerempung Apai Indai enggau Pengajar (PIBG) Sekula Primari (SK) Haji Junid ditu bisi nerima agih belanja sepenyampau RM50,000 dikena Nyeleti Jalai Tama ngagai sekula nya ari Kaban Kaunsil Nengeri (Adun) Kabong, Mohd Chee Kadir.

Chee Kadir madah, jalai tama ngagai sekula nya enda likun sereta tusah ditengah laban lichau lebih agi maya musin landas.

“Arapka penembu jalai tu ila ulih mutarka penanggul jalai ke udah lama ditapi staf sekula sereta apai indai nembiak ke bisi anak besekula ditu.

“Nya alai, terima kasih ngagai Perintah Gempung Parti Sarawak (GPS) betuaika Kepala Menteri Datuk Patinggi Abang Johari Tun Openg laban udah ngemendarka agih belanja dikena nyeleti jalai tu,”ku iya.

Iya madah munyi nya pengudah nyua agih belanja dikena Nyeleti Jalai Penama Sekula Primari (SK) Haji Junid di Gerigat ensana.

Berebak,Kepala Pengajar SK Haji Junid,Jamel Razali, 52 taun madahka sida deka baum dulu enggau PIBG sekula nya dikena nentuka hari endur ngaduka jalai rusak nya ngena chara beripai.

“Udah tu kami deka baum nentuka hari ke patut endur beripai ngemanahka jalai rusak nya.

“Pengawa tu deka digaga lengkas laban timpuh sekula dibuka nyau majak sempil,” ku iya.

Jalai ti rusak nya ngembuan pemanjai urung 500 meter sereta tujuh meter pemesai.

Udah nya, Chee Kadir bisi limpang ngabas dua iti agi projek di Gerigat iya nya Projek Ngaga Baru Sekula Repuk nengah agih RM 1 Billion ari perintah Sarawak (Fasa 1) SK Haji Junid ke mungkur pengawa ngaga baru empat unit rumah pengajar enggau siti blok tiga ringkat, projek tu udah belabuh digaga kenyau ari 20 Julai 2020 sereta disadang tembu 9 Januari 2022 ila.

Nangkan nya, Chee Kadir mega bisi ngabas Projek Nyeleti Dewan Gerempung Orang Berikan Sitak (PNK) Gerigat ke beungkus RM 100,000.

Sama bisi datai Ketuai Genturung Pendiau Abang Sharif,Abang Ahmad sereta Exco PIBG SK Haji Junid.