KUCHING: Ketuai Komuniti enggau Ketuai Raban Bansa (KMKK) mesti nyadi mata enggau pending perintah sereta beempu tanggung pengawa nentuka menua tu lepas ari Covid-19, pia ku Sapit Ketuai Parti Pesaka Bumiputera Bersatu Pampang Satok Datuk Ibrahim Baki.

Ku iya, KMKK beempu tanggung pengawa enggau seruran bejejaga beduduk ari kes positif Covid-19 ke majak nambah ba menua tu.

“Kitai ngembuan tanggung pengawa ngelara nembiak redak ti enda nitihka atur (SOP) ti udah ditetapka lebuh mindah ke bukai.

“Kitai mega mesti bejimat laban penusah baka kampar tama ke menua tu nengah jalai chit tau ngeruga pengelikun komuniti,” terang Ibrahim.

Ibrahim mansutka jaku nya rambau Pengerami Makai Malam diatur Penghulu enggau Ketuai Raban Bansa Dun N8 Satok, malam kemari.

Nambahka nya, iya madahka KMKK mesti nyaga kandang menua sereta nyaga pengelantang enggau pengelikun.
“Ketuai komuniti enggau ketuai raban bansa nya nyadi chunto enggau ikon ngagai komuniti renggat baruh.

“Nya kebuah, genap ketuai komuniti ti udah dichiri mesti kemerah sereta ngembuan kaul ke manah enggau peranak menua.

“Naka tu, kitai udah nyiri urung 6,000 iku ketuai raban bansa ba menua tu,” terang iya.

Ku Ibrahim, kenyau ari taun nyin tadi, Kepala Menteri Datuk Patinggi Abang Johari Tun Openg udah ngaga pemutus sereta ngembuan sistem ke manah.

Terang iya, Perintah Sarawak udah nyiri lebih ari 1,000 ketuai raban bansa enggau tuai rumah ari bansa Melayu, Melanau, Iban, China enggau ke bukai.

Berebak enggau nya, iya madahka Kepala Menteri Datuk Patinggi Abang Johari Tun Openg berasai gaga kelebih agi sitak Dun Satok.

Kebuah pia ku iya, naka tu nadai penanggul nyadi bekaul atur ketuai komuniti lalu sida udah bejalaika pengawa enggau manah.