KUCHING: Lapan gerempung ukai perintah (NGO) Dayak nyukung penuh langgur penemu pasal Hari Gawai enggau Pengerami Kaamatan dirintai dalam kemisi Malaysia.

Sida tu nyengkaum Gerempung Pemikir Dayak Sarawak (DTTAS), Kongres Bansa Dayak (DNC), Gerempung Iban Sarawak (PAIS), Gerempung Balang Balai Nyabong (BBN), Gerempung SADIA Miri, Gerempung Terabai Menua Sarawak, Gerempung Penyambung Tanah Hak Adat Bansa Asal Sarawak (TAHABAS) enggau Serakup Hak Orang Asal Sarawak (SCRIPS).

Ba sebengkah penerang begulai sehari tu, peminta Menteri Dagang Temuai, Seni enggau Main Asal Datuk Seri Nancy Shukri nya sigi patut laban nya endang kemisi besai ba Sabah enggau Sarawak aja, tang nya beguna beguna awakka nengeri-nengeri bukai mereti agi pasal pengerami nya.

Nerang silik, pengari sida iya nya Sapit Presiden DTTAS Edward Awan madah, ambika banding pengerami Gawai Dayak endang pengerami ke pemadu besai lalu pengerami tu disambut endang nitihka adat asal bansa di Sarawak.

“Tu mega kelai penyerakup enggau pengelantang ti mandangka rayat pupu bansa di Malaysia,” ku iya.

Nya alai, iya madah piak sida ngansak Menteri Besai Tan Sri Muhyiddin Yassin ngaku 1 Jun nyadi kemisi ba selampur menua Malaysia sereta digazet dibaruh kemisi perintah besai.

Edward madah pengawa ngaku kemisi 1 Jun ba selampur menua Malaysia beguna amat laban nya tau mandangka peragam ke lebih manah sentang atur perintah besai ngagai Sabah enggau Sarawak.

“Pengawa ngaku kemisi 1 Jun tu mega deka meri peluang ngagai bansa Dayak ke gawa di Semenanjung Malaysia enggau Sabah bela ngerami Gawai ba rumah sida di menua orang lalu enda ibuh minta kemisi pulai ke menua di Sarawak.

“Pengerami tu diintu ba palan gawa sereta rumah sida mega deka nambahka penemu, pemereti ati pasal adat enggau daya idup bala bakih ke sama enggau sida gawa pasal pengaya adat pupu bansa di Malaysia,” ku iya.