KUCHING: Sarawak nyadi ‘lubuk emas’ rayat menua luar kelebih agi ngagai raban pekereja laban ngembuan sistem ekonomi ti manah.

Kepala Menteri Datuk Patinggi Abang Johari Tun Openg madahka taja raban pekereja ti tama kitu bisi ti ngena jalai chit nengah garis entara menua tang nya nandaka menua tu nyadi palan pemadu engkeman endur sida ngiga jereki.

“Tu tau disemaka kitai baka ‘Semut Nutu Gula’.

“Nya nandaka ekonomi kitai manah laban dipegai perintah ti manah,” ku iya.

Abang Johari bejaku munyi nya lebuh bejadika Program Nasih Tanah Projek Rayat Ngaga Balai Lumba enggau Mensia Mayuh sereta Hab Inovatif Batu Kawa ditu, kemari.

PROJEK RAYAT, Datuk Patinggi Abang Johari Tun Openg (kiba) disempulang (ari kiba) Adun Batu Kitang, Lo Khere Chiang, Datuk Sri Dr. Sim Kui Hian, Direktor Kompeni Tenaga Sri Wangsa, Hong Boon Swee enggau Datuh Ahmad Ibrahim rambau Pengawa Nasih Tanah Projek Rayat Balai raya Komuniti/Lumba enggau HUB Inovatif di taba lama kuari Ang Cheng Ho, Jalai Stephen Yong, Batu Kawa, Kuching kemari. -GAMBAR GHAZALI BUJANG

Iya mega pechaya dalam kandang lima ngagai sepuluh taun agi menua tu niti jalai ti betul sereta mansang.

“Kitai bisi penatai pemisi lebih laban ngembuan sumber ti mayuh.

“Projek bakun, kuasa karan enggau ke bukai bisi udah diambi kitai pulai baru lalu dipejalai ba baruh kuasa kitai empu.

“Aku ulih ngaga semua tu laban orang Sarawak bisi ba belakang aku,” ku iya.

Tandu iya, taja Perintah Sarawak minta sekeda kuasa nya pulai baru, nya ukai mai reti menua tu deka ngatika diri.

“Kitai ukai deka ngatika diri, tang kitai semina deka ngetanka hak Sarawak.

“Diatu semua pejalai belanja kitai udah betul.

“Sida di renggat Perintah Besai din, nyentukka seharitu agi belaya berebutka pangku pengawa Menteri Besai tang kitai ba Sarawak kiruh ngaga projek pemansang,” ku iya.

Ngelansa pasal Balai Raya Lumba enggau Mensia Mayuh sereta Hab Inovatif Batu Kawa nya, iya madahka projek ngaga balai nya siti ari perambu Adun Batu Kawa Datuk Sri Prof Sim Kui Hian dalam ngerembaika pemansang di Kuching.

Iya madahka taba lama Kuari Ang Cheng Ho nya kelia dilembang endur ngulihka batu dikena ngaga jalai alun tang udah enda dikena agi ketegal tikas ngambi batu ba palan nya udah chukup.

Iya mega nandu, pemansang di genturung Batu Kawa tu deka berubah dalam kandang lima taun agi lalu deka besambung enggau menua Bau ti tebilang ketegal pemanah Tasik Biru iya nya lubuk ngiga emas kelia.

Sama bisi datai Menteri Kaunsil Kandang Menua enggau Pengawa Berumah ti mega Adun Batu Kawa Datuk Sri Prof Sim Kui Hian, Sekretari Perintah Sarawak Datuk Amar Jaul Samion, Chairman Kaunsil Kandang Menua (MPP) Lo Khere Chiang enggau bala bukai.