KUCHING: Opis Pengerai Nengeri Sarawak (JKNS) ngenukuka siti agi kluster baru iya nya Kluster Bah Sayap ba Pelilih Miri, ditu kemari.

Sapit Kepala Menteri ti mega Chairman Komiti Penyangga Penusah Nengeri Sarawak (JPBNS) Datuk Amar Douglas Uggah Embas madahka kluster nya ngaul Pelilih Miri di Sarawak enggau Kota Kinabalu di Sabah.

Ku iya, indeks kes ngagau kluster tu iya nya kes ke-1,116 ti udah ditemu kena 31 Disember 2020 asil iya beperesa laban bisi kelai ba sebuah sepital peribit di Miri.

“Naka tu, lima iku kes positif ngaul kluster tu nyengkaum kes indeks ti nambah siti kes kemari.

“Bisi 48 iku udah diperesa enggau lima kes ditemu positif Covid-19 (siti kes baru), 41 iku negatif enggau dua iku agi nganti pemutus,” ku Uggah ba aum pemberita Covid-19, ditu lemai kemari.

Uggah madah, bisi dua kluster agi ngerekai ba Sarawak iya nya Kluster Stutong di Kuching enggau Kluster Mador, Meradong kelimpah ari Kluster Bah Sayap.

“Kluster Stutong, Kuching nambah siti kes kemari ngujungka kes dalam kluster tu nambah ngagai 10 kes seraya Kluster Mador, Meradong mengkang ngerikod lapan kes,” ku iya.

Iya mega madahka Pelilih Kuching, Miri, Sibu, Bintulu, Meradong, Bukit Mabong enggau Lawas mengkang ba status kuning pengudah ngerikod 26 kes ba timpuh 14 hari ke udah.

“Bisi 33 buah pelilih bukai di Sarawak mengkang status gadung,” ku Uggah.