BIPEROH, siti ari 20 suku raban bansa Bidayuh ti diau ba kandang menua Penrissen, sepanjai Jalai Puncak Borneo tau temegah enggau pemansang diasaika sida dalam bidang ekonomi sereta pekara pelajar kenyau ari timpuh 20 ngagai 30 taun ke udah.

Etnik Bidayuh bukai baka Salako, Lara, Jagoi, Singgai, Biatah, Pinyowah, Bengoh, Bianah, Bukar, Sadong, Krokong, Bilo’ih, Bunuk, Pinyowah, Braang, Tibiya, Bisapuk enggau Bisetang.

Nitihka penerang, lebih ari 15,000 orang Biperoh diau ba semilan buah genturung pendiau.

Tu nyengkaum ba Kampung Emperoh Jambu, Semadang, Karu, Garung, Giam Baharu, Giam Amba, Git, Nyiruk/Grait enggau Sebetung.

“Ba ujung taun 50-an, 60-an enggau 70-an, tebal agi orang Biperoh idup seranta.

NANGGAM KAUL… Entara bala ketuai etnik Biperoh ti begulai makai serumpu taun baru tu tadi. GAMBAR BERNAMA.

“Tang diatu pengidup sida jauh berubah enggau makin maju baka raban bansa bukai,” ku Ketuai Komuniti Bidayuh, Penghulu Richard Deho ari Kampung Emperoh Jambu.

Iya madahka etnik Biperoh diatu udah berubah ari pengawa dikereja sida suba baka semina ngemeratka pengawa betanam betupi pindah dikemeran aki ini sida kelia.

Rebak Biperoh diatu ngembuan pelajar tinggi lalu bisi sekeda nyadi raban profesional, pedagang, kaban politik sereta eksekutif perintah.

UDAH MAJU

SEJARAH BIDAYUH… Baruk tu rumah endur naruh pala munsuh ti udah dipumpung ba jeman perang kelia kelimpah endur nyimpan keresa lama bansa Bidayuh.- GAMBARhttp://wolfwoof652.blogspot.com

Etnik Biperoh diatu udah idup nitihka gaya moden enggau ngembuan rumah ti lantang sereta likun kelimpah disikap perengkaguna baka jemari, televisyen, sofa, mesin basu sereta peti ais enggau ngembuan entukar kediri.
Ku Deho, status ekonomi enggau pengidup sida mega berubah nitihka arus pemansang kelimpah kaul serakup enggau etnik bukai majak rat laban tebal agi sida kawin champur.

“Bekaul pekara pelajar, peratus Biperoh ti ngembuan pelajar tinggi ke alai mayuh orang mujur nyadi raban profesional baka profesor, raban ekonomi, lutur, luyar, injinir, arkitek enggau pedagang.

“Tang, bisi sekeda peranak ditu gawa perintah enggau ba sektor peribit.

“Pemansang infrastruktur nyengkaum jalai alun, arus penyambung, bekal ai enggau kuasa karan udah ngubah tikas pengidup komuniti Biperoh.

“Ba timpuh 30 taun, pemansang majak nyadi ngagai kandang menua kami,” ku Deho nerang.

Ex-Presiden Serakup Biperoh Kuching (BAK), Dr Benedict Poris Besong madahka etnik Biperoh udah nyapai mayuh pemansang lalu penumbuh serakup nya dalam taun 2007 mandangka siti ari pemujur dalam sejarah etnik Biperoh nentuka etnik nya mansang baka komuniti bukai.

PEKARA PELAJAR

“Ari etnik ti tinggal ari sukut pekara pelajar, etnik Biperoh diatu udah berubah enggau makin nyulut dalam pelajar.

“ Kebuah pia laban aki ini kami besedia nganjung anak sida besekula ngiga pemandai taja pengidup kami suba agi merinsa.

“Nya alai, aku meri jaku puji ngagai rebak biak Biperoh laban keran ngiga pemandai taja pengidup kitai mayuh penimpang ngambi bulih pengidup ke menyana dudi hari,” ku Benedict.

Presiden Serakup Biperoh Kuching (BAK), Mangan Ngandok madahka Biperoh maju 20 ngagai 30 taun dibanding pelilih bukai di Sarawak ari sukut pemansang infrastruktur.

Ku iya, semua semilan buah genturung pendiau Biperoh (taja ukai semua rumah) udah disikap bekal kuasa karan enggau ai.

Peranak mega muntang ngulihka servis berubat lalu tebal agi, genturung pendiau mega bisi sekula primari.

Mangan ngarapka perintah ulih berundingka pematut nirika abis nadai sebuah sekula sekondari semak palan pengentap Biperoh laban penyampau tubuh peranak ditu majak nambah.

Iya madahka inisiatif tu nentuka bala nembiak enda ibuh diau bemalam ba buding.

Terang Mangan, komuniti Biperoh mesti bejalaika mayuh pengawa mantu perintah mai mayuh agi pemansang kelebih agi ari sukut aktiviti ekonomi sereta penyerakup pupu bansa.

“Kami deka nanggam kerejasama enggau komuniti, organisasyen sereta ejensi perintah ke pemaik begulai,”tandu iya.

Ba lansa sama, Mangan madahka pengari rayat ti dipilih iya nya Adun Mambong, Datuk Dr Jerip Susil enggau

Kaban Parlimen Puncak Borneo, Willie Mongin mesti meri perati ngambi mutarka sekeda isu ti apin diputar baka arus penyambung, rumah kea pin disikap bekal kuasa karan enggau mai mayuh agi aktiviti ekonomi ngagai komuniti ditu.

SEJARAH BIPEROH

Nitihka tipan sejarah, suku etnik Biperoh tu asal ari peturun Segum Seberi, anak lelaki M’buk Rubuh asal ari Sungkong (S’kung), Kalimantan, Indonesia tang diau ba Rabak Mikabuh nyadi kampar.

Udah nya, M’buk Rubuh jadi enggau siku lelaki ari Rabak Mikabuh enggau ngadaka enam iku anak.

Enam iku anak seduai iya nya Segum Seberi (Biperoh), Ma Bari (Bengoh), Sabu Pagunja (Bunuk), Serum Domanan (Bumbok di Bau), Jaya Janum (Pinyowah) enggau Seju Berung (Braang).

Nama laki M’buk Rubuh nadai ditemu tang peturun iya nya aris Tinnabi (lelaki keterubah Rabak Mikabuh) enggau Trauh (siku temuai ari seberai ti ngenduh ba Rabak Mikabuh ari peturun Tinabi pengudah penusah bah besai nyadi).

Ku sekeda penemu orang tuai Biperoh, kelia Biperoh mesti madahka sida asal ari S’kung ngambi nyaga pengelikun diri.

Jeman nya digelar Bisoron tauka Hari Bedarah, mai reti timpuh bedengah.

Etnik Biperoh begunaka suku etnik ke kering agi ari menua Kalimantan ngambi ngelindung enggau ngayung sida.

Enti etnik Biperoh madahka diri ari S’kung, sida deka dilindung Biskung (orang ari S’kung) ari kena serang munsuh.

Ari jerita bukai ditusui bala orang tuai Biperoh, sida nya peturun Tinnabi, Tirauh enggau indu ari S’kung benama M’buk Rubuh.

Kaban sejarah, Dr Chang Pat Foh dalam bup iya, History of Bidayuh in Kuching Division, Sarawak, bisi nulis pasal siku lelaki ti udah nyaga semua etnik Biperoh diatu benama Segum Seberi, anak lelaki tuai M’buk Rubuh.
Nya kebuah, etnik Biperoh tau ngaku sida nya peturun M’buk Rubuh.

Chang madahka etnik Biperoh nya terubah iya pindah ari Rabak Mikabuh lalu udah nya mansang ngagai Sebayat,  palan pengentap pemadu besai diuan 60 ruang bilik.

Nitihka penerang, Kampung Sebayat nya dipechaya nyadi palan pengentap etnik Biperoh.

Sir Hugh Low, Sekretari Labuan ti nemuai ngagai Sebayat dalam taun 1845 madahka panggah tauka baruk (ketuai rumah endur naruh pala munsuh ti dibunuh maya perang) didiri ba mua rumah panjai sida.

PALAN PENGENTAP

Udah nya, sida pindah laban deka nangkir palan pengentap, penyakit ke suah ngerekai sereta suah kena serang raban bansa Iban Skrang.

Tiga raban ninggalka Sebayat laban deka ngentak palan pengentap baru ba Bung Kom, Bung Tabak enggau Bung Sepit.

Ke penerang semua, semilan genturung pendiau Biperoh ke diatu nya asil sida ti pindah ngagai Kampung Boyan udah nya ngentak Kampung Giam.

Ke diatu, Kampung Giam dibagi ngagai dua iya nya Kampung Giam Amba enggau Kampung Giam Bauh.

Bisi temuai ari Bung Kom ti enda pindah ngagai Kampung Boyan udah diau mendam ba Tebawang Git.

Penumbuh Kampung Git enggau Kampung Grait/Nyiru nya penatai ari palan pengentap baru ari Tembawang Git.

Berebak enggau nya, peranak ari Bung Tabak pindah ngagai Tanjung Garung enggau Tanjung Semadang.

Sida pindah ngagai Tanjung Garung enggau ngentak genturung pendiau baru dikumbai Kampung Garung.

Nangkan nya, sida ti pindah ngagai Tanjung Semadang udah ngentak genturung pendiau baru dikumbai Kampung Semadang.

Kampung Emperoh Jambu nya nampung Kampung Garung pengudah enam ruang bilik betuaika Mejar ninggalka Kampung Garung lalu pindah ngagai Sungai Pangga ba Pelilih Padawan.

Terubah iya, sida ngangauka palan pengentap baru iya nya Kampung Tebon lalu nukar nama nyadi Kampung Emperoh Jambu nyentuk diatu.

Kampung Karu nya asil penatai peranak ari Bung Tabak enggau Bung Sepit.

Taja pia, majoriti peturun ba Kampung Karu nya datai ari Bung Tabak.

Kampung Sebetung tu tamping ngagai Kampung Karuk e alai dalam taun 1875, seraban peranak betuaika Bai Manggu ninggalka Kampung Karu lalu bejalai ngagai Sungai Semadang Kiri enggau genturung pendiau baru semak Landeh.

Ba Landeh nya, sida ngentak sebuah genturung pendiau baru dikumbai Kampung Sebetung.

Diatu, semua tujuh palan pengentap iya nya Bung Sebayat, Bung Kom, Bung Tabak, Bung Sepit, Bung Gigi, Bung Sitiang enggau Bung Metaan udah ditinggal.-BERNAMA