SIBU: Taja bedau mayuh tang bala pedaja diperati udah bisi nyual buah dabai ba Pasar Sentral Sibu.
Dabai diatu benung berega lalu semina mimit aja pedaja ti nyual buah tu.

Pia mega, Dabai tu dijual berega RM30 ngagai RM60 sekilo dibanding RM10 ngagai RM30 sekilo maya musin dabai.
Siku pedaja ti enggai dikelala nama madahka buah dabai ti dijual iya nya diangkat iya ari siku pengempu pun dabai di Kanowit.

“Diatu baru deka berengkah musin dabai lalu mayuh agi dabai deka dijual udah tu.

“Kami melaba engka tengan bulan tauka ujung bulan laban maya nya ila mayuh buah dabai udah mansau.

“Dabai ti dijual aku tu buah ti mansau ujung bulan Disember tu tadi.

AGI BARU… Barang sapa ti deka meli Dabai Sibu, tau ngelawa Pasar Sentral Sibu.

“Nya kebuah, rega iya mar laban nadai mayuh buah ti udah mansau.

“Buah dabai ari Kanowit engka mayuh udah mansau dulu dibanding pun dabai ba kandang menua bukai,” ku iya lebuh dirandau ba Pasar Sentral Sibu.

Iya mega madahka rega dabai nya nitihka pemesai iya.

“Enti buah dabai tu besai sereta lunak, kami nyual iya RM60 sekilo lalu buah ti mit nya berega RM30 sekilo,” terang iya.

Siku orang ti rindu makai buah dabai benama Mohd Saleman Ibrahim mega udah meli buah dabai ti dijual ba pasar iya.

NADAI NGIRA MAR… Mohd Saleman lebuh meli buah dabai ba Pasar Sentral Sibu.

“Aku sanggup meli buah dabai berega RM40 sekilo laban aku endang rindu makai buah dabai tu.

“Engka udah tu rega buah dabai tu nurun pengudah semua pun baka di Song, Kapit enggau endur bukai udah mansau ila.

“Ninting taun, buah dabai ti baru mansau endang mar dijual orang laban mayuh buah dabai bukai bedau mansau,” terang Mohd Saleman.

Lebuh bejalai ke Pasar Sentral Sibu, mayuh pengusung bela napatka buah dabai nya taja mar rega.

Ketegal ingin deka ngasaika penyamai buah dabai tu, sida nadai ngira rega laban buah tu mansau sekali setaun aja.