Orang Iban ba rumah panjai tauka lebuh nurun ke umai endang begunaka garam.

Pekara tu bebida enggau kami sebilik diatu ke alai dua iku anak aku suah ngulai sos chabi dalam lauk enggau jarang begunaka garam lebuh ngulai lauk.

Utai ke balat ngasuh aku alit ati nya bala anak begunaka sos chabi lebuh makai asi.

Mulaika kenang, lebuh nurun ke umai tauka kebun nangkal getah tauka nginti, pekara keterubah ti suah disebut apai nya ngasuh kami mai duku enggau garam lebuh nurun ke tanah.

“Kitai begunaka duku dikena mantap tauka mela ikan, dagin jelu, bulu babas, pun kayu enggau ke bukai lebuh nurun ke kampung,” ku pesan apai lebuh bisi pejalai ke kebun getah tauka bejalai ke kampung.

BESAI GUNA… Garam entara utai pemadu diguna lebuh nurun ke tanah kelebih agi lebuh bemalam ba kampung.

Garam beguna amat dikena ngulai lauk ngambi bisi asai baka lebuh nyumai ikan, undang, ketam, dagin, paku enggu bulu babas ke bukai.

“Enti nadai mai garam, kitai sempama baka nurun beperang nadai mai senyata,” ku apai ngajar indai enggau kami semenyadi.

Aku nyebut pasal sos chabi laban deka mandingka pengidup kelia ti begunaka garam enggau pengidup moden kemaya hari.

Dalam taun 60-an, kami jarang begunaka sos chabi lebuh bejalai ngagai kampung.

MANAH DIKASAM… Ikan ulih nginti manah amat dikasam.

Tang, garam enggau gula endang utai pemadu diguna ba genap rumah.

Kami sebilik suba endang naruh mayuh garam laban suba ke nadai peti ais.

Kebuah pia laban garam beguna amat dikena ngasam lauk lebuh pulai ngasu tauka nginti.

Ambika chunto, lebuh nurun ngasu, niang aya Ngauh Narang (menyadi tuai sida indai) mujur nimbak jugam tang jugam nya agi jejengap.

Bendar iya ngentum jugam dataika jugam nya parai. Aya Ngauh semina ulih ngesan pala jugam nya pulai ke rumah.
Udah nya, menyadi aku, Jon enggau apai nyempulang iya ke kampung ngambi mai sekeda rengka tubuh kea pin ulih disan aya Ngauh tadi.

Pengudah semua renga tubuh jugam udah disan bai pulai ke rumah, indai lalu ngambi sekeda dagin jugam nya ngambi dikasam.

Bendar kami sebilik makai kasam jugam lalu bisi sekeda dagin jugam nya diberi ngagai aki Jembu.

Rumah aki Jembu ba Munggu Embawang penyauh urung 45 minit bedarat nengah jalai kampung ari rumah kami.

Maya kemisi sekula, aya Ngauh enggau Jon mujur ngesan jani kampung enggau rusa ditimbak seduai ba kampung.

Enti nadai Jon, aya Ngauh deka bejalai jauh ke dalam kampung nangika nadai bulih jani kampung tauka rusa.

Aku deka nurun nginti enggau apai ngena ‘pigo’ tauka suah dikumbai lampu suluh.

Lampu suluh nya beguna amat lebuh nurun ngiga ikan, undang enggau pama.

Bisi sekali lebuh nurun nyuluh, kami duai bulih lebih ari 30 iku pama nyengkaum tujuh iku kena bunuh apai.

Apai ngena jangkam dikena munuh pama nya lalu semua pama ulih kami duai malam nya lalu dipanduk ngena ruas.

Ba aku, pama dipanduk dalam ruas pemadu nyamai ditambah enggau isi pama ke manis enggau agi baru nya.