KUCHING: Maya sektor dagang temuai majak angkat ba sarawak, mayuh orang apin nemu pengelebih ngemansangka sekeda kandang menua nyentuk sekeda palan besejarah di menua ti ditinggal enggau enda diintu meruan.

Pasar Siniawan tu sebuah pasar lama beumur lebih 100 taun ba Siniawan, penyauh 26 kilometer ari Pasar Kuching entara palan sejarah ti ditinggal peranak ditu laban pindah ngagai mengeri baru baka Kuching enggau Bau.

Siniawan, sebuah pasar mit baka pasar koboi dalam filem Wild West ke semina bisi siti jalai enggau pasar nya puang maya hari gawa.

Jalai besai ba pasar lama tu dikepit dua blok ti ngembuan 24 kedai bedindingka kayu.

Kitai deka ngingatka kenang lama lebuh ngelawa pasar ti ngembuan kedai bedindingka kayu.

RICHAH… Pasar Siniawan richah laban pasar tu dibuka maya ujung minggu. Gambar ari sarawaktourism.com

Taja sekeda dinding kedai nya udah ditukar tang gaya asal kayu ba begunan nya agi dijaga.

Utai ke narit ati ditu nya pasar mit tu majak tebilang laban ngembuan pasar malam dibuka ninting ujung minggu ti nyendiaka bemacham bansa pemakai enggau suah dilawa bala pengusung ari Kuching.

Ngenang baru penatai asal, Siniawan tu sebuah pasar endur bedagang ti maju lalu tebal agi diuan peranak peturun

Hakka enggau nyau deka nyadi pasar ti ditinggal suba.

Tang, berekat inisiatif dipejalai peranak dia, pasar mit nya berubah manah pengudah sida bejalaika model dagang baru kenyau ari taun 2010 kelimpah ngeranchakka agi aktiviti ekonomi komuniti ba Siniawan.

NYAMAI… Entara bansa pemakai ti bisi dijual maya Pasar Malam Siniawan.

Dagang chara baru dipejalai sida iya nya Pasar Malam ujung minggu ke suah ditapatka pengusung nyengkaum temuai menua luar tiap ujung minggu.

Pasar Malam Siniawan tu dibuka berengkah ari pukul 6 lemai nyentuk 11 malam maya Hari Lima enggau Hari Enam seraya buka pukul 5 lemai nyentuk 11 malam maya Hari Minggu.

Enti kita raun ke Kuching maya ujung minggu, anang enda ingat ngelawa Pasar Malam Siniawan.

“Nadai rugi ngagai pasar malam Siniawan laban bemacham bansa pemakai tau diuji,” ku Egberg Koh, 61 taun ari Kuala Lumpur ti kala nemuai ngagai bazar tu sebedau Atur Mindah Betagang (PKP) diterit bulan March taun nyin tadi.

Ku iya, keterubah iya nemuai kitu nya dalam pun taun 1980-an enggau bazar nya agi puang enggau enda rami baka ke diatu.

LAKU… Puk-iuk entara pemakai ti laku enggau suah ditapatka bala pengusung lebuh ngelawa Pasar Malam Siniawan. Gambar ari sarawaktourism.com

“Pasar tu suba baka palan ti ditinggal lalu semina mimit aja kedai dibuka.

“Tang aku berasai tekenyit meda pasar tu rami amat lebuh aku nemuai kia ba bulan March taun nyin kemari,” ku Koh nerang.

Siku temuai, Carol Chong, 58 taun ari Selangor mega gaga meda pasar nya udah jauh berubah seraya madahka pasar nya makin richah enggau nyendiaka bemacham pemakai sereta nitihka rega ti patut.

Bisi bansal ba sepanjai jalai mega ditusun mija ba sepanjai begunan kedai kayu nya.

Bemacham bansa pemakai bisi dijual baka pemakai orang China, pemakai asal Melayu enggau pemakai bukai bak kuih enggau kek.

Pengudah ngasaika penyamai bansa pemakai ti dijual enggau kenang manis nemuai ke pasar malam nya, Koh enggau Carol madahka seduai deka nemuai baru kia dudi hari.

Kelimpah ari nya, seduai mega deka nusui penyelai pasar malam Siniawan ngagai bala bakih ari Semenanjung Malaysia ngambi sida bisi ati deka nemuai ngagai pasar koboi tu.

Taja pia, PKP ketegal pandemik Covid-19 ngujungka perambu nemuai baru ngagai pasar tu tejanggal.

“Perambu nemuai ke Sarawak ditangguh ketegal pengerekai Covid-19 tang kami deka nemuai baru begulai enggau bala bakih ti gagit pengudah meda gambar enggau mendingka cherita kami,” terang Carol.-BERNAMA.