PUTRAJAYA: Opis Menteri Pengerai Malaysia (KKM) benung mansik strategi baru ngambi dibantai ngagai Kaunsil Pengelikun Menua (MKN) dikena nagang pengerekai kes Covid-19 ti niki ninting hari.

Ketuai Direktor Pengerai, Tan Sri Dr Noor Hisham Abdullah madah, entara strategi ti benung diserenih iya nya bejalaika atur bebida entara nengeri zon mirah enggau gadung sereta neritka atur adan menua entara nengeri.

“Ba nengeri dalam zon mirah, atur ke terit agi deka dipejalai nitihka kluster ba nengeri nya.

“Kami mega deka neritka atur ba adan menua ngambi nagang sida bejalai ngagai nengeri enggau pelilih bukai.

“Kami mega deka nyekat pejalai ngambi nagang enggau ngurangka penyampau kes ari 2,000 ngagai 200 sebedau ngatur pekara tu enggau manah agi,” ku iya ba aum pemberita Covid-19, ditu ensanus.

Dr Noor Hisham madahka KKM benung mansik model dikena Sarawak nagang pengerekai Covid-19 ba nengeri nya lebuh ngasuh semua pengusung tauka sida ti pulai kia mesti swab test enggau dikuarantin dulu.

“Strategi kitai deka berubah lalu kitai deka bejalaika inisiatif ba sebengkah endur dibanding bejalaika atur ba selampur menua.

“Pekara tu agi dikerandau lalu KKM deka meri sanding penemu tang perintah mesti pintar ngaga pemutus,” ku iya seraya madahka KMM ngadang kes ninting hari deka nambah dalam timpuh dua minggu kelebih agi pengudah Taun Baru.

Iya mega madahka atur ti diterit kenyau ari 14 Oktober tu tadi mujur nagang kes niki ngenyit tang apin mujur nurunka kes berampit ti agi ba tikas R-naught 1.1 ngagai 0.5.

Nambahka nya, Dr Noor Hisham madahka KKM benung berundingka pematut engkah kes positif nadai kelai enggau bisi kelai ke enda balat ba palan kuarantin ti dikena temuai ari menua luar seraya pengereja menua luar diperubat ba Palan Kuarantin enggau Berubat Covid-19 Lubah Dirampit (PKRC).

Dr Noor Hisham madahka naka tu nadai kluster baru ditemu seraya Pesakit Agi Dipatau (PUS) enggau Peskait Agi Dipansik (PUI) ukai entara sida ti napi penusah bah tu.

Iya madah munyi nya lebuh ditanya bekaul pengirau ati Covid-19 ulih ngerekai ba palan ngenduh (PPS) beduduk ari penusah bah ba lima nengeri iya nya Selangor, Perak, Terengganu, Pahang enggau Johor, -BERNAMA