SADONG JAYA: Speaker Dun Sarawak Datuk Amar Mohamad Asfia Awang Nassar ngansak mensia mayuh ditu terus meri sukung ngagai Adun Sadong Jaya Aidel Lariwoo ngambi ngetanka penuduk iya maya Pengawa Bepilih Nengeri Ke-12 (PRN-12) ke deka datai.

Ku Asfia, Aidel nya siku orang ti bagas gawa, berintegriti enggau lurus ati kenyau ari dipilih nyadi pengarap ditu dalam taun 2011 suba.

Pia mega ku iya, nya kebuah Aidel udah dichiri nyadi Chairman Komiti Akaun Perintah (PAC) Sarawak.

“Kami nadai kakang datai ngagai Sadong Jaya tu laban iya ‘lurus ati’, nya kebuah kami dekaka iya (Aidel) dipilih sekali agi nyadi chalun ditu.

“Aku mega deka meda YB kita tu angkat sumpah sekali agi dalam Dun,” terang Asfia.

Asfia mansutka jaku nya ba Program Pemesai Begulai Enggau Rayat beserimbai enggau Pengawa Nyuaka Pmereri Mesejit enggau Surau ba sitak N.24 Sadong Jaya di Masjid Darul Iman, ditu kemari.

Berebak enggau nya ku Asfia, sitak Sadong Jaya mega kubu tegap Parti Pesaka Bumiputera Bersatu (PBB) kenyau ari Sarawak merdeka dalam taun 1963.

“Aku ngarapka peranak ba Sadong Jaya ulih ngasuh GPS menang besai maya PRN-12 ila.

“Aidel udah gawa manah ba sitak Dun Sadong Jaya, nya kebuh kami minta iya bediri minta pilih baru ditu ungkup penggal baru ila,” ku iya nerang.

Beduduk ari nya, iya nyemetak madahka mensia mayuh enda ibuh betalatka sekalika GPS tauka PBB menang tauka enda.

“Pekara ke patut dipetalat ditu iya nya piak ti dilaban nya lenyau duit chengkeram tauka enda,” ku Asfia nyemetak madah.

Asfia mega madahka Dun Sarawak deka padam kena 6 June tu.