SIMANGGANG: Bukit Lesung entara palan ke ulih nyadi produk dagang temuai ba Simanggang enggau ulih matak perati sida ke rindu niki bukit enggau aktiviti kasar.

Adun Bukit Begunan, Datuk Mong Dagang madahka penumbuh Sitak Pemansang Sri Aman (SADA) deka ngeranchakka ekonomi rama kelimpah nempa pengawa puang ngagai peranak ditu.

Ku iya, homestay (rumah temuai) ba Munggu Sawa udah tembu didiri sereta bisi pengulih matak temuai bemalam dia.

Mong mega ngelalau rayat ba kandang menua nya anang nyual tanah sida tang patut ngena tanah nya enggau minta bantu ari perintah.

Iya mega ngemendarka agih belanja Projek Mit Pemansang Menua Pesisir (MRP) RM17,000 ngagai Komiti Pemansang enggau Pengelikun Genturung Pendiau (JKKK) Rumah Denis Unop, RM 15,000 ngagai JKKK Rumah Jampang Tibu enggau bela RM 10,000 ngagai Biro Indu Rumah Denis Unop enggau Rumah Jampang.

Nambahka nya, iya mega ngagihka belanja Program Tranfomasyen Menua Pesisir (RTP) dikena melakin jalai ngelawa rumah panjai beungkus RM 100,000.