PETALING JAYA: Aum Supreme Kaunsil Parti Pribumi Bersatu Malaysia (Bersatu) ti fokus ngagai sekeda isu bekaul pengelantang rayat abis urung pukul 11.45 malam kemari.

Menteri Besai, Tan Sri Muhyiddin Yassin ti pansut ari indu opis parti nya pukul 11.54 malam kemari madahka penerang bekaul isi aum deka dikeluarka Sekretari Besai Parti, Datuk Seri Hamzah Zainuddin ila.

“Sekretari Besai deka ngeluarka penerang rasmi lalu kami udah berandauka mayuh pekara,” ku iya ti mega Presiden Parti lebuh dirandau pemberita pengudah ngetuaika aum nya.

Nambahka nya, Sapit Presiden Bersatu, Datuk Seri Ahmad Faizal Azumu madahka aum malam kemari berandau pasal pemaik rayat kelimpah pasal pengerekai Covid-19 enggau penusah bah ba sekeda nengeri sereta perambu deka ngabas penusah nya.

Dulu ari nya, Muhyiddin udah ngetuaika aum nya pukul 8.25 malam kemari.

Entara kaban ti udah datai maya aum tu iya nya Sapit Presiden Parti, Datuk Seri Dr Ronald Kiandee sereta raban Supreme Kaunsil Datuk Seri Mohamed Azmin Ali, Datuk Seri Mohd Redzuan Md Yusof enggau Chairman Biro Penyambung Nengeri Pahang, Datuk Saifuddin Abdullah.

Sama datai Ketuai Srikandi Bersatu Datuk Seri Rina Mohd Harun, Ketuai Armada Bersatu Wan Ahmad Fayshal Wan Ahmad Kamal, Ketuai Pemadah Parti Wan Saiful Wan Jan enggau Sapit Ketuai Srikandi Bersatu Datuk Mas Ermieyati Samsudin.- BERNAMA