KUALA LUMPUR: Parti Pribumi Bersatu Malaysia (Bersatu) madahka Pengawa Bepilih Besai Ke-15 (PRU-15) semina patut dipejalai pengudah pandemik Covid-19 mujur ditagang enggau pukas.

Pemutus ti digaga lebuh aum Supreme Kaunsil (MPT)Bersatu malam kemari betuaika Menteri Besai ti mega Presiden Parti, Tan Sri Muhyiddin Yassin.

Ketuai Pemadah Bersatu, Wan Saiful Wan Jan ba sebengkah penerang bekaul aum MPT nya madahka, tuju besai Bersatu diatu deka ngemeratka inisiatif nagang pandemik Covid-19 enggau mulaika baru pemanah ekonomi menua.

“Bersatu deka fokus nyaga pengelantang rayat kelebih agi maya pengerekai Covid-19 enggau penusah bah diatu.

“Atur sekeda piak ti majak bejaku pasal politik maya rayat benung napi penusah endang pekara ke enda patut,” ku iya nyemetak madah.

Wan Saiful mega madahka Bersatu deka ngetanka kerejasama politik disetuju parti dalam Perintah Perikatan Nasional (PN) ngambi nyerakup rayat.

Nambahka nya, pekara tu mega deka terus dipejalai ngambi nyamin pengelantang rayat pupu bansa enggau pengarap.

“Dalam konteks PN, Bersatu deka terus negapka kerejasama politik begulai enggau parti Perikatan Nasional bukai baka PAS, Parti Solidariti Tanah Airku (STAR) enggau Parti Maju Sabah (SAPP),” ku iya.

Iya mega madahka Bersatu ngelalau semua kitai mantaika penaluk enggau pengeran nengah disiplin organisasyen nentuka kerejasama politik ti ditempa dalam PN terus dipebasa enggau dijaga manah.

“Bersatu ngaga pemutus deka fokus negapka parti nengah gaya politik servis enggau politik prihatin sereta ngasuh semua raban parti nyuaka bantu ngagai rayat ti tusah,” ku Wan Saiful.

Semua ti ngulu aum nya besetuju ngatur Jelajah Bersatu 2021 enda lama agi ngambi meri penerang bekaul pekara ke nyadi diatu-BERNAMA.