KUCHING: Komiti Penyangga Penusah Nengeri Sarawak (JPBNS) madahka Sarawak ngerikod kluster baru iya nya Kluster Keranji Tabuan ba Pelilih Kuching.

Chairman iya, Datuk Amar Douglas Uggah Embas madahka indeks kes tu iya kes ke-1,158 lebuh meresa sida ti bisi kelai kena 5 Januari tu tadi.

Ku iya, bisi 54 iku udah diperesa ke alai enam kes ditemu positif (lima kes baru), enam iku ditemu negatif enggau 42 iku agi nganti pemutus.

Bekaul pengawa nyidi kes ba Rumah Sungai Putong, Ulu Undop enggau Rumah Bui Panjai, Lubok Antu, Komiti Penyangga Penusah Bagi Menua Sri Aman udah bejalaika pengawa nyidi kes lebuh nganjung ejensi penerit adat matau rumah panjai nya ngambi enda pansut lalu orang luar enda lama kia.

Pengawa tu dipejalai beduduk ari ngerikod kes positif baru ari rumah panjai Sungai Putong, Ulu Undop.

Opis Pengintu Pengelantang Mensia Mayuh mega udah nganjung bekal pemakai ngagai dua buah rumah panjai nya.

JPBNS udah baum enggau ngaga pemutus semua pengajar ari Semenanjung, Sabah enggau Labuan ti tama ke Sarawak deka dikuarantin ba palan kuarantin pengelama 10 hari.

Ku Uggah, Sida deka diperesa ba hari kedua enggau kelapan lalu deka dikemendar pansut ba hari ke-10 pengudah pemutus peresa nya negatif. Sida deka nyambung laluh empat hari kuarantin nya ba rumah.

Uggah madahka pengawa rejister ngagai kedai diatur mesti ditulis ba bup rikod lalu mesti nulis nama, lumur telefon enggau jam tama ke kedai nya.

Penguna ti ngelui ari 37 pengangat isi enda dikemendar tama ke kedai nya.

Naka tu, Sarawak ngerikod empat kluster baru iya nya Kluster Keranji Tabuan di Kuching, Kluster Bah sayap di Miri, Kluster Stutong di Kuching enggau Kluster Mador di Bintangor.