KUCHING: Bisi 200 palan di Mengeri Kuching nuju ke Kota Samarahan deka disikap enggau 800 unit ‘kamera TV (CCTV)’ deka lalu dipelaba tembu dipasang ujung taun tu.

Menteri Kaunsil Kandang Menua enggau Pengawa Berumah Datuk Sri Prof Sim Kui Hian madahka, pengawa masang CCTV nya sebagi ari inisiatif ba baruh tuju mengeri pintar enggau agenda ekonomi digital.

“Tender projek deka dibuka Kaunsil Multimedia Sarawak (SMA) ujung bulan tu nengah tender tebuka.

“Kitai melaba projek deka berengkah dipejalai ba renggat kedua taun tu,” ku iya lebuh ditanya pemberita rambau bejadika CCTV Mengeri Pintar di Batu Kawa ditu, kemari.

Ku iya, nengah projek masang CCTV nya raban penerit adat deka muntang agi matau penanggul jalai alun sekut enggau penanggul bukai ti bekaul.

Iya mega madahka, CCTV tu deka dipasang ba genturung Majlis Bandaraya Kuching Selatan (MBKS), Dewan Bandaraya Utara Kuching (DBKU), Kaunsil Kandang Menua Padawan (MPP) enggau Kaunsil Kandang Menua Kota Samarahan (MPKS).

“Rakam CCTV nya mega deka meri penerang ngagai ‘Pusat Operasi Bersepadu Sarawak (SIOC)’ sereta meri data terus (real-time footages) ninting hari (24/7) dalam setaun.

“Berindik ari nya, semua data deka dikumpul ngagai SIOC ti nyadi palan pemadu bekuasa,” ku iya.

Iya mega nandu, nengah chara nya data rakam CCTV tu deka ulih dikena mayuh bengkah ejensi bekaul baka polis enggau ke bukai lebuh mutarka penanggul ti ayan.

“Perambu tu engkeman dalam meri servis ti meruan sereta jampat kelebih agi maya bisi pengawa salah enggau vandalism, jaku gerah tumu napi bah enggau ke bukai,” ku iya.

Ungkup rikod, sitak Batu Kawah aja deka dipasang urung 21 unit CCTV nyengkaum palan bebeli barang Emart Batu Kawa, Waterfront Batu Kawa, Palan Komersial Batu Kawa 38, MJC, Kuching City Mall, kedai di Desa Wira, Sekula Sekondari Min Lit enggau SJK Chung Hua Moyan.

Ba pekara bekaul, Kui Hian madahka diatu urung 80 peratus lampu trafik di Kuching udah diseruri ngagai Lampu Trafik Pintar kenyau pengawa nya berengkah taun siti nyin kemari.

Kelimpah lampu trafik pintar, iya madahka inisiatif mengeri pintar tu mega dikerembai ngagai pengawa ngumpul sampah pintar dikena mutarka penanggul sampah bekukun kelalu lama.

Berebak enggau nya, Menijar Besai SMA Dr Zaidi Razak madahka palan SIOC deka dipadahka Kepala Menteri Datuk Patinggi Abang Johari Tun Openg dalam timpuh enda lama agi.

“Taja pia, diatu palan nya agi dalam proses digaga lalu dipelaba urung 97 peratus udah tembu,” ku iya.
Sama bisi datai Sekretari Plitik Kepala Menteri Tan Kai enggau bala bukai.