“Bisi sekali, aku bemimpi betemu enggau siku indu lalu indu nya madahka iya malu lalu nanya dini baju tang mua iya enda ulih dipeda laban iya bejaku melakang ke aku.

“Dalam mimpi nya tadi, indu nya madah ‘miak angai ako, gaanlah bajau ko, debei bajau’ (aku malu, dini baju aku laban aku tu nadai ngena baju).

“Pengudah tedani ari mimpi, aku berumban nanya ngagai manang pasal pekara nya.

“Manang madahka lungun bansa Melanau tauka dikumbai Kelidieng nya mesti dibalut manah ngena kain kuning.

“Udah ninga jaku dipadahka manang nya tadi, aku lalu minta staf muzium nutup tubuh kelidieng nya ngena kain kuning.

BALUT MANAH… Tubuh kelidieng dibalut kain kuning pengudah Morshidi bemimpi pasal siku indu.

“Pengudah aku telefon ngagai staf muzium pasal mimpi aku tadi, ujung minggu nya meli kain kuning ngagai Lebuh India ngambi dibalut ba tubuh kelidieng,” ku Ketuai Kampung Morshidi @Han Bakri.

Nya mih entara peneleba sereta mimpi ke mengkang dikeingat Ketuai Kampung, Kampung Morshidi @Han Bakri, 67 taun ti mega ketuai tim Gadeng Teruna Desa Melanau Kampung Sungai Ud Dalat.

Tim Gadeng Teruna Desa Melanau Kampung Sungai Ud Dalat udah datai bemain Gadeng Melanau maya pengawa mindahka Kelidieng ari Sekama ngagai Kompleks Muzium Sarawak ba bulan nyin kemari.

MIMPI

Lebuh dirandau Suara Sarawak apin lama, Morshidi madahka mimpi nya endang amat mandangka utai ke nyadi lebuh aku bemimpi pasal kelidieng tu pengudah berapa hari udah dipindah.

Sebedau tu, kelidieng semina dibap ngena kain karpet sebedau staf muzium meresi ngambi ukir nya enda rusi.

“Ba hari keempat pengudah kami pulai ari Kuching, aku bemimpi baru lalu ari mimpi nya kitai nemu kelidieng tu ngembuan semengat indu bansa Melanau lalu iya malu laban kelidieng nya enda dibap tauka dibalut enggau manah.

“Aku berasai nangi maya tinduk pengudah bemimpi pasal kelidieng nya.

“Ku manang ti landik pasal Kelidieng, lungun tu kebendar bisi mua lalu mua lungun nya tadi dibap ngena kain burak lebuh pengawa mindahka iya.

“Tang, manang ti bisi datai ngagai pengawa nya mega madahka tubuh kelidieng enda dibap pengudah pengawa mindah nya tembu,” ku iya nerang.

Ba pengawa nya, Morshiri udah ngetuaika raban pemuzik gadung mindahka kelidieng nya.

Pengawa nya mega mesti dipejalai enggau penuh basa nyengkaum mesti diuluka manang.

“Lebuh kami nebah gadeng maya mai kelidieng nya, aku ulih meda kelidieng tu baka ti gaga idup baru dataika kami ngetu nebah kereban muzik.

“Kelidieng dalam lori kren nya baka ti engkebut ngagai kiba enggau kanan baka ti betanda.

“Reti iya, kelidieng tu idup baru laban adat kelidieng diidupka baru.

“Nya kebuah, kelidieng tu mesti didiri tegut agi lalu kelidieng tu endang engkebut baka ti betanda sekumbang kami nebah muzik asal Melanau,” ku iya nerang peneleba maya pengawa mindahka kelidieng nya.

“Semua kali dalam lori nya alit ati tang mengkang jenuh enggau enda ngetu nebah kerean muzik dataika kelidieng tu tadi dibai ngagai kimbis ba mua muzium nya.

“Pengudah dibai ngagai kimbis ba mua muzium nya, manang nutup kelidieng nya ngena kain burak,” terang Morshidi.

Morshidi ngarapka pengawa nirika baru Kelidieng nya ulih dipejalai enggau penuh adat Melanau.

Pengawa nirika kelidieng tu diperambu deka dipejalai bulan April tu enti nadai penanggul nyadi.

“Baka selama, kami deka nyendiaka berau kuning, manuk ngambi disayat (simah), begadeng enggau pengawa ngenah pemakai Melanau (kaul) laban kitai deka ngaga Kaul mimit ba muzium ila.

“Aku ngarapka Muzium Sarawak ulih ngintu manah pesaka Melanau tu.

“Kebuah pia laban lungun tauka kelidieng tu mesti dijaga manah laban aku empu udah dipesan dalam mimpi,” tandu iya.

DIINTU MANAH… Kelidieng ti dipindah ari Sekama ngagai Kompleks Muzium diatu udah dibalut staf Muzium Sarawak enggau manah ngena kain kuning.

GADENG TERUNA DESA MELANAU

Ba lansa bukai, naka tu Gadeng Teruna Desa Melanau Kampung Sungai Ud Dalat ti ditumbuh kenyau ari taun 2014 ngembuan tiga tim.

“Dua tim dipasuk nembiak enggau siti agi tim dipasuk veteran lalu naka tu tiga tim nya dipasuk lebih 20 iku.

“Ngelama tu, orang bukai ninga tiun muzik ditebah nya sebaka tang enti kebendar bebida laban genap pengawa ngembian tiun bebida (rotan).

“Pia mega, kaul mega ngembuan tiun ti bebida lebuh bepencha enggau betanda.

“Lebuh mai kelidieng enggau nirika kelidieng ba Muzium Sarawak ila, tiun ditebah kami mega bebida laban nya entara adat Melanau ti mesti dibasa, ditampung enggau ditebah,” ku iya nyimpul randau.

Pengawa namaka lungun tu udah dipejalai kena 27 September 2020 ngagai Muzium Budaya Borneo (Muzium Baru) mujur sereta diintu enggau penuh basa.

Menteri Dagang Temuai, Seni, Main Asal Datuk Abdul Karim Rahman Hamzah ti udah datai ngemata pengawa mindahka kelidieng nya madahka Kelidieng nya kebendar datai ari Kampung Ud, Dalat kenyau taun 1962 menya lalu diayanka ba Muzium Lama.

Karim mega madahka kelidieng tu beumur manggai 200 taun laban iya digaga ba kurun ke-19 masihi. Iya digaga ari kayu tebelian lalu diukir nitihka ukir bansa Melanau.

Ku iya, kelidieng nya entara keresa lama bansa di Sarawak ti deka dibai tama ngagai muzium baru lalu mensia mayuh deka meda kelidieng tu bedidi tetegi lebuh tama ba mua pintu muzium baru kitai ila.

UDAH DIPINDAH… Karim mega udah datai ngemata pengawa mindahka lungun tauka kelidieng bansa Melanau.