KUCHING: Pemenang MyHackathon Sarawak nerima perais tambah RM50,000 enggau RM5,000 ari Sarawak Digital Economy Corporation Berhad (SDEC).

Kepala Menteri Datuk Patinggi Abang Johari Tun Openg udah dipebasa nyuaka perais ngagai pemenang dalam kategori Marathon enggau Sprint ba Wisma Bapa Malaysia, apin lama ke udah.

MyHackathon nya pekit inovasyen ba selampur menua diatur Opis Menteri Sains, Teknologi enggau Inovasyen (MOSTI) nyadi sebagi ari Pelin Mulaika Pemanah Ekononomi Nasional (Penjana) ti fokus nyendiaka servis perintah ngagai mensia mayuh ngena teknologi enggau digitalisasyen.

Bisi enam renggat Hackathon tu ke alai tiap Hackathon fokus ngagai topik ke bebida sereta ngembuan dua kategori.

Dua kategori tu iya nya marathon enggau sprint enggau dipejalai ba enam nengeri baka Kuala Lumpur, Johor Bahru, Kuala Terengganu, Kota Kinabalu, Pulau Pinang enggau Kuching.

Pekit tu udah dibuka ngagai semua rayat Malaysia enggau dipejalai berengkah ari bulan Oktober nyentuk Disember 2020.

Kena 7 Disember 2020, tim menua iya nya Neuon Al Sdn Bhd betuaika Chai Kok Chin nerima mata duit RM250,000.00 pengudah nyadi siku ari pemenang dalam kategori Marathon enggau projek dikumbai RoadPlus: Al Power Asset Management Infrastruktur ti fokus pasal pemanah chara ngemanah jalai.

Pemenang kategori Sprint, Mohammad Norhamizan Bin Abu Bakar enggau tim iya nerima mata duit RM10,000 nengah projek dikumbai Skoupidia iya nya pelasar ngagai serikat ti nguna barang udah dikena nitihka penyampau ketuai bilik ba kandang menua sida.

Sama datai ngarika SDEC iya nya Tan Sri Datuk Amar Mohamad Morshidi, Sudarnoto Osman, Malseni Jamal, Hazwan Razak, Mohd.Azizee Jemari, Khairool Adzelan Aman, Sharifah Athirah Wan Annuar enggau pemenang MyHackathon kategori Marathon, Chai Kok Chin, Chang Yang Loong, Chai Koh Kiong, Ahmad Hazim Ahmad Fuad sereta pemenang kategori Sprint, Mohammad Norhamizan Abu Bakar dan Amir Azizi Musa.

NYULUT… Abang Johari nyuaka perais tambah ngagai pengari pemenang MyHackthon kategori Marathon, Chai Kok Chin. Bisi dipeda, Mohamad Morshidi (kiba).