KUCHING: Taun 2021 nyentukka 2025 endang awak dikena Perintah Sarawak bejalaika semua pelasar enggau konsep pemansang nengeri ti udah diperambu ari taun 2017 ngagai 2020, ku Kepala Menteri Datuk Patinggi Abang Johari Tun Openg.

Ku iya, pekara nya endang nyengkaum pemansang infrastruktur baka jalai alun, bekal kuasa karan, bekal ai enggau ke bukai.

“Nitihka padah Sarawak Energy Berhad (SEB) kitai nyangka deka bulih bekal kuasa karan penuh ke rumah panjai enggau kampung di menua pesisir ba taun 2023 banding taun 2025 laban teknologi ti dikembuan kitai diatu sereta pejalai Skim Bekal Kuasa Karan Alternatif Menua Pesisir Sarawak (Sares) majak manah.

“Baka nya mega bekal ai ti dipeda aku ulih dipejalai penuh ba selampur nengeri ba taun 2023 tauka 2024,” ku iya dalam randau khas ditu, kemari.

Ku Abang Johari, lebuh semua perengka pemun tu udah bisi, nya deka ngasuh rayat di menua pesisir muntang bekaul dalam mayuh bengkah sektor nyengkaum betanam betupi, dagang temuai, servis enggau ke bukai lalu nyadi pekara pemadu beguna dalam ngubah ekonomi Sarawak.

“Reti nya, taun 2021 nyadi taun keterubah kitai ngemujurka semua projek ngagai taun 2025 ila.

“Kelimpah ari nya, kitai mega ulih nyendiaka sumber pengereja pengawa enggau pemansang peneleba, ke alai ba pengujung taun 2025 ngagai 2030 kitai benung mansang nuju juluk ati kitai iya nya nyadi nengeri pemadu maju di Malaysia,” ku iya.

Ku Abang Johari, iya andalka semua juluk ati tu ulih dijapai enti perintah nengeri merambu semua projek pemansang enggau meruan.

“Aku enda berani madah kitai ulih nyapai perambu 2030 tumu agi ari ti udah dilanggur laban aku pechaya ‘kita jangan takbur’.

“Tang kitai mesti merambu enggau manah, laban aku meda nya nyangka ulih nyadi palan besai ngagai menua Malaysia.

“Kebuah pia, laban kitai bisi sumber enggau peneleba, nya tau narit ati pemeranak puku lebuh sida ulih datai ngagai palan ti ulih ngeluarka produk ti diterima makit kitai,” ku iya.

Iya mega andalka enti Sarawak ulih narit mayuh agi pemeranak puku, nya deka ngasuh menua tu nyadi palan pemadu beguna ti ulih ngerembaika ekonomi Malaysia.