SARIKEI: Juluk pemansang deka ngasaika disambung bekal kuasa karan endang udah lama dianti peranak rumah panjai Muara Payang ditu.

Menteri Muda Perambu Mengeri, Pengatur Tanah Enggau Rampa Menua Sarawak, Datu Len Talif Salleh madah diatu juluk sida di menua nya udah nyadi nyata pengudah semua pengawa masang meter karan ba rumah panjai tembu.

“Diatu juluk sida serumah deka ngasaika disambung bekal kuasa karan udah nyadi nyata beduduk ari pengawa nyambung meter karan ke baru tembu.

“Pengudah datai ngabas kitu, aku berasai tepantup ati enggau pengawa ke udah dipejalaika raban kunterikta ke bekaul,” ku iya seraya madah projek nya digaga ungkup pemaik peranak rumah panjai.

Len ke mega Kaban Kunsil Nengeri (Adun) Kuala Rajang madah muny inya maya ngabas projek nya kena Hari Lima tu tadi.

Nangkan nya, Len madah, projek nya endang sebagi ari pemansang ke udah disemaya nengah Projek Transformasyen Menua Pesisir (RTP) Projek Bekal Karan Menua Pesisir enggau enda lama agi deka datai Projek Bekal Ai enggau jalai ke Muara Payang.

Ku tandu Len, perintah GPS seruran nemu semua pekara ke diguna peranak menua pesisir lalu ngarapka rayat terus meri sukung sereta mandat ba Pengawa Bepilih Besai Nengeri Ke-12 ila.