KUCHING: Siti ari chara munaska penyeranta iya nya meri pelajar ti manah ngagai bala anak ti kurang penatai pemisi awakka ulih ngubah pengidup sida, ku Kepala Menteri Datuk Patinggi Abang Johari Tun Openg.

Ku iya, taja mayuh bansa penyeranta tang tebal agi pun penanggul nya nyadi ketegal nadai bulih pelajar sereta penemu dalam pupu bansa.

“Penyeranta tu enti dipeda, datai empas ari nadai penemu. Enti nuan seranta penemu, nuan deka seranta.

“Taja pia enti kitai ulih meri penemu tu, nya deka ngubah nasip sida. Nya alai, fokus perintah nengeri diatu endang ngagai sukut penemu pelajar ngambika ulih ngurangka penyeranta,” ku iya lebuh randau khas, ditu ensana.

Iya madahka entara chunto iya nya meri latih ngagai anak enggau apai indai nya empu ti tau munaska penyeranta.

“Nya kebuah aku bepegai teguh ngagai jaku China – anang meri ikan, tang ajar sida ngiga ikan.

“Tu endang chara kitai ulih ngubah nasip sida, lalu mayuh udah pemujur orang seranta nyadi kaya laban sida bisi pelajar enggau penemu,” ku iya.

Nya alai, iya terus ngelalau raban nembiak keluar ari penyamai sida diatu sereta besemekih ngiga pemandai lalu anang semina nyadi ‘jaguh kampung’ aja.

“Kelimpah ari nya, tu mega nyadi tanggungpengawa perintah nyendiaka belanja dikena ngerembaika pekara pelajar baka nambahka biasiswa enggau pinjau laban nya ulih mantu ngubah nasip anak ti kurang penatai pemisi enggau orang kampung.

“Raban tu enti diberi peluang enggau penemu, sida sigi tetap ulih berubah sereta ulih nambahka penatai pemisi,” ku iya.