SIBU: Komiti Penyangga Penusah Nengeri (JPBN) Sibu minta barang sapa ke bisi ngulu pengawa rabat ba Rumah Langi, Pasai Siong kena 29 Disember 2020 nyentuk 31 Disember 2020 tu tadi datai beperesa pengerai ba Klinik Pengerai Jalai Lanang tauka Klinik Pengerai Sibu Jaya.

Pekara tu beduduk ari kes positif Covid-19 ke ditemu ngerampit peranak rumah panjai ke bekaul.

“Peranak Sibu mega dilalau terus nitihka SOP kelimpah enda ibun mindah ari rumah nyema nadai pekara berat deka diadu,” ku iya.

Sebedau tu raban Polis Diraja Malaysia (PDRM) udah ngempang pejalai ba lapan buah rumah panjai berengkah pukul 11.30 malam ensana.

JPBN Sibu nengah sebengkah penerang madah, pemutus nyaga digaga beduduk ari 37 kes dirampit Covid-19 ditemu ba Rumah Langi Pasai Siong ditu.

Raban polis benung nirika langkau arau dikena bejejaga sekumbang atur ngempang jalai ngelawa lapan buah rumah panjai ke bekaul. -Gambar PDRM

“Kes kena rampit penyakit nya ditemu pengudah meresa siku indu ke baru pulai ari Johor (Kes 1175) kena 29 Disember 2020.

“Bekau ari nya, bekal pemai enggau perengka pengerai deka disedia ngagai lapan rumah panjai ke bisi kaul enggau pengawa ngempang jalai nya,” ku iya.

Dulu ari nya, Opis Menteri Pengerai udah meresa 74 iku peranak Rumah Langi kena 7 Januari tu tadi lalu pemutus kena 8 Januari tetemuka bisi 37 kes positif Covid-19.

“Nya alai, bepun ari malam ensana, semua penumpang ke sangkai ba Padang Bilun Sibu ari luar Sarawak terus kuarantin di hotel.

“Sebedua tu kitai napi penaggul ngiga hotel nyadi palan kuarantin,” ku penerang nya.

Tandu penerang nya, atur tumu ke digaga iya nya natak penerebai tama ke Sibu bepun sehari tu (10 Januari 2021) iya nya semina dua penerebai ari Kuala Lumpur ninting minggu dikemendar tama ke Sibu.

“Kami mega udah nganjung bala penumpang ke datai na Padang Bilun Sibu ari luar Sarawak ngambika dikuarantin ba palan kuarantin ba menua diri empu baka di Betong, Sarikei, Mukah enggau Kapit.

“Penerebai ari Johor Baharu enggau Kota Kinabalu bela ke Sibu mega deka dikinsil bepun sehari tu (10 Januari 2021),” ku iya.

Iya madah, sebarang pemutus deka ngatur sebarang program begelumu bebala mayuh ke udah dikemendarka JPBN Sibu sebedau tu dikinsil tekala nya.