MIRI: Ketuai komuniti tauka mensia mayuh ti kala ngulu penusah rabat ba Rumah Langi, Pasai Siong berengkah ari 29 Disember tu tadi dipinta beperesa pengerai.

Menteri Komiti Penyangga Penusah Bagi Menua Miri (JPBBM), Datuk Lee Kim Shin madahka sida ti kala kia mensti beperesa pengerai.

“Mensia mayuh ti diau ba Bagi Menua Miri iya nya ba Pelilih Miri, Subis, Beluru, Marudi enggauTelang Usan ti kala datai ba pengawa ngubur ba Rumah Langi, Pasai Siong, Sibu tauka ngagai rumah panjai semak Pasai Siong berengkah ari 29 Disember 2020 nyentuk 8 Januari tu tadi dipinta datai beperesa,” terang iya, ditu ensanus.

Kim Shin ti mega Menteri Perengka Pengangkut Sarawak madahka sida ngemeratka kes berampit Covid-19 ngaul sekeda peranak rumah panjai ba Sibu.

“Sida ti kala datai ngagai pengawa nya mesti telefon ngagai Bilik Operasyen Opis Pengerai ba lumur, 085-410722 (Pelilih Miri / Subis) tauka 019-6038159 (Beluru / Marudi / Daerah Telang Usan) ngambi beperesa pengerai,” ku Kim Shin.

Ku Adun Senadin nya, sida ti bisi kelai deka beperesa RT-PCR Covid-19 ti deka dipejalai Opis Pengerai.

Nangkan nya, siku indu ti pulai ari Johor laban datai ba pengawa ngubur niang apai iya tu ditemu mai penyakit

Covid-19 ‘super spreader’ngujungka Covid-19 ngerekai ngaul lapan buah rumah panjai enggau ngerikod 37 kes ba Sibu.

Staf Opis Menteri Pengerai Malaysia (KKM) udah meresa 74 iku peranak Rumah Langi ke alai 37 iku ditemu positif Covid-19.

Sida ti ditemu positif ba rumah panjai tu iya nya peranak beumur 11 bulan ngagai 79 taun nyengkaum lima iku ari sida nya anak mit baruh umur 12 taun.

Nitihka pansik tumu, semua kes nadai mantaika kelai kelimpah bisi sekeda sida madahka diri renga enggau batuk.

Ngelansa pasal Kluster Bah Sayap, pengawa nyidi kontak semak agi dipejalai lalu naka tu, 459 iku udah beperesa RT-PCR COVID-19.

Ari penyampau nya, lapan iku ditemu positif, 234 ditemu negatif seraya 217 iku agi nganti pemutus.

Nya alai, Kim Shin ngelalau mensia mayuh nitihka Atur Pengawa Standard (SOP) ditetapka Opis Menteri Pengerai Malaysia (KKM) enti mindah ke bukai.

“Mensia mayuh dilalau nyeliahka diri ari 3S (Endur ti Dedar, Sekut enggau Berandau Semak) lalu ngemeranka 3W (Masu Jari, Ngena Sengkabung Mua enggau Bejejaga).

“Atur tu ulih mantu perintah ngerintaska rantai Covid-19,” terang Kim Shin.