KEDUP: Kampung Prangkan Mawang deka bisi gerija baru nengah agih belanja ari Unit Pekara Pengarap Bukai (Unifor) penyampau RM80,000.

Kaban Kunsil Nengeri (Adun) Kedup, Martin Ben maya ngabas projek nya Hari Lima tu tadi madah, terubah iya suba agih nya deka dikena ngemanahka gerija aja tang diubah deka digaga baru.

Agih belanja tambah diguna dikena nembuka gerija nya patut dikerandau enggau Kaban Komiti (AJK) gerija sebedau dianjung ngagai Opis Servis Dun Kedup enggau nuju opis Unifor.

Berebak enggau nya mega, bisi diatur Program Abas Pengasih Raban Indu Kunsil Nengeri (Dun) Kedup nuju empat iku orang tuai.

Udah nya, ba sebengkah agi pengawa ke diatur ba endur bukai, Martin bisi nyerahka Projek Ngaga Parit Simen Kampung Sangai Empani urung 224 meter pemanjai udah digaga berengkah 28 Disember 2020 lalu dipelaba tembu 28 April 2021.

Iya madah peminta ngaga bilik opis Balai Raya Ba Kampung Sangai Empani udah diperunding lalu dipelaba deka digaga dalam taun tu.

Ku iya, Komiti Pemansang Enggau Pengelikun Genturung Pendiau (JKKK) enggau mensia mayuh patut nemu semua atur peminta projek endang patut diperunding enggau disetuju dulu.

Semua peminta pojek deka diperati silik enggau berundingka peminta bukai ari 68 buah genturung pendiau di sitak Dun Kedup.