SIBU: Stadium Betutup Sibu ba Jalai Tuanku Bujang deka nyadi palan kuarantin tambah dalam napi sebarang pekara ti nyadi bekaul pangka pandemik Covid-19 ditu.

Pekara nya dipadahka Ketuai Komiti Penyangga Penusah Ngenyit Nengeri (JPBN) Bagi Menua Sibu Charles Siaw lebuh dirandau raban pemberita kemari.

Residen Bagi Menua Sibu nya mega madahka palan nya deka berengkah dibuka pengabis laun kena Hari Tiga (13 Januari) tu.

“Pengawa ngatur palan nya nyau deka tembu lalu khemah mega udah didirika ba dalam stadium.

“Enti nadai penanggul palan nya deka dibuka pengabis laun kena Hari Tiga tauka tumu agi ari nya enti semua pengawa tembu tumu,” ku iya.

Siaw madahka palan nya nyadi palan tambah ungkup palan kuarantin ti udah bisi ba ditu.

Ku iya, Sibu diatu bisi empat palan kuarantin iya nya ba Sibu Diocesan Pastoral Centre, Kem Nembiak Kemuyang enggau dua buah hotel.

Iya mega madahka kenyau 8 Januari tu tadi, sida ti datai ke Sibu ari luar Sarawak udah bejalaika kuarantin ba hotel enggau nadai bisi agi orang dikuarantin ba rumah.

“Penerebai udah tu (ari luar Sarawak) ti deka sangkai ba Sibu iya nya kena Hari Tiga (13 Januari) tu,” ku iya.