SARATOK: Komiti Pemansang enggau Pengelikun Genturung Pendiau (JKKK) enggau Gerempung Indu sida diperansang nganjung peminta ungkup taun 2021.

Sapit Menteri Pengeluar Kuasa enggau Pengeraja Asal, Ali Biju madahka kaban komiti patut udah bisi perambu ungkup pemansang rumah panjai tauka genturung pendiau sida ke taun tu.

Ku iya, peminta ke diterima Palan Servis Komuniti Sitak Parlimen Saratok deka digumpul dulu ngambi diperati dikena nentuka ni bagi projek ke patut dirumban.

“Baka selama, aku deka ngumpul dulu semua peminta kita taun tu ngambi dibantai enggau diperunding ni bagi ke patut diadu dulu nitihka pemesai guna dalam komuniti.

“Ari peminta nya mega aku ulih berandauka penyampau agih belanja ke patut begulai enggau bala komiti dikena ngemujurka projek ke dipinta kita.

“Nya kebuah aku minta kita anang laun nganjung peminta nyengkaum langgur belanja ke dipinta, penerang enggau kereban ke diguna,” ku iya.

Ali ke mega Kaban Parlimen Saratok mansutka jaku nya beserimbai enggau Program Randau Begulai Enggau Rayat ba Rumah Jamu Anang, Pligong ditu, apin lama ke udah.

Berebak enggau nya, iya mega dipebasa bejadika Gerempung Indu Rumah Jamu sereta nyuaka chek Projek Mit Pemansang Menua Pesisir (MRP) RM30,000 ungkup JKKK seraya RM10,000 enggi gerempung indu rumah panjai nya.

Berita penuh Ruai 8 pagila