DALAT: Ketuai Polis Pelilih Dalat, DSP Saga Chunggat ngelalau peranak ba lima buah rumah panjai ditu ngasika Atur Mindah Betagang Penyuman (PKPP) ti diterit kena Hari Satu tu tadi.

Lima buah rumah panjai nya; Rumah Simu, Rumah Bihai, Rumah Bangi, Rumah Agup enggau Rumah Rantai.

Pekara tu beduduk ari penerang Komiti Penyangga Penusah Nengeri Sarawak (JPBNS) madahka Pelilih Dalat ngerikod 17 kes positif Covid-19 bepun ari Kluster Pasai di Sibu.

Terang iya, nengah gerah diterima ari Opis Menteri Pengerai Malaysia (KKM) minta peranak dia enda ibuh mindah ke bukai jam ke diatu.

“Sida dia mega dipinta terus diau ba rumah lalu ditagang ngusung rumah panjai bukai nyentuk KKM tauka Opis Pelilih mantaika gerah baru.

“Kami deka matau ungkup pengelikun semua nitihka sanding penemu KKM,” ku Saga lebuh dirandau Suara Sarawak, ditu tadi.