KUCHING: Pansik Klinikal Renggat Ketiga vaksin Covid-19 deka berengkah dipejalai kena 21 Januari tu ba semilan buah sepital Opis Menteri Pengerai Malaysia (KKM) nengah Palan Pansik Klinikal (CRC).

Menteri Besai Tan Sri Muhyiddin Yassin madahka disadang 3,000 iku volunteer deka ngaul diri dalam pansik klinikal keterubah dipejalai ba Malaysia tu.

Ku iya, Malaysia deka nyadi menua keterubah ba luar menua China ungkup pansik inactivated Covid-19 vaccine digaga Institute of Medical Biology Chinese Academy of Medical Sciences, China (IMBCAMS).

“Semua perengka regulatori nyengkaum pemendar etika ari Medical Review & Ethics Committee (MREC) lalu kepenudi, Clinical Trial Import License (CTIL) ari NPRA udah diambi kena 8 Januari tu tadi,” terang Muhyiddin.

Pia mega, Muhyiddin madahka Unit Regulatori Farmasi Menua (NRPA) mega udah ngemendarka pengawa rejister vaksin Covid-19 ti diasilka serikat farmaseutikal, Pfizer.

Nya alai ku iya, Malaysia disadang deka nerima bekal vaksin Pfizer ungkup renggat keterubah dalam ujung bulan Februari.