KUCHING: Penyampau tubuh sida ke tasah bah di Sarawak majak nambah naka tengahari tadi ngaul 507 ruang bilik enggau 1,826 iku.

Berindik ari nya 33 buah Palan Ngenduh (PPS) udah dibuka ngagai sida di Kuching, Samarahan, Serian enggau Miri.

Nitihka ripot Komiti Penyangga Penusah Nengeri Sarawak (JPBNS), naka tengahari tadi mega, kandang menua Kuching pemadu mayuh ampuh bah ngujungka 23 PPS udah dibuka endur 337 ruang bilik enggau 1,250 iku diau ngenduh.

Dua PPS dibuka di Samarahan endur 33 ruang bilik enggau 95 iku, enam PPS di Serian endur 133 ruang bilik enggau 452 iku sereta dua PPS di Miri endur empat ruang bilik enggau 29 iku diau ngenduh dulu.