NUJM minta aum pemberita betemu mua patut dikurang

KUCHING: Gerempung Pemberita Nasional Malaysia (NUJM) udah ngeluarka surat penerang minta semua aum pemberita nyengkuam ejensi perintah tauka peribit patyt digaga chara digital enggau natak aktiviti aum pemberita chara betemu mua.
Presiden iya, Farah Marshita Abdul Patah madah, atur nya digaga bepelasarka kes positif Covid-19 ba raban orang politik lebih agi Kaban Parlimen enggau menteri Kabinet sereta kes ke majak niki ninting hari manggai lebih 3,000 kenyau minggu ke udah.
“NUJM minta kerejasama semua raban ungkup pemaik raban pemberita lebuh sida deka meri komen tauka penerang pasal sesebengkah isu.
“Tu nyengkaum pengawa pemberita ti ngulu palan mensia mayuh, ngaga tinjau enggau nengah palan jalai ke diempang,” ku iya nengah sebengkah penerang ensana.
Kenu k iya, atur nya patut dititih semua raban dikena nagang pengerekai penyakit Covid-19 kelimpah dikena ngemuujurka raban media bejalaika tanggung pengawa sida.
“Patut nemu, semua raban pemberita entara orang ke pemadu mudah kena rampit penyakit tu lebuh sida nurun bejalaika pengawa, tang suah amat pengelikun sida enda dikemerat.
“Penyampau raban pemberita ke gawa diatu majak mimit, tang sida gawa ukai semina ngaga berita bekaul enggau isu Covid-19 tang mega bekaul enggau penusah bukai baka ampuh bah, politik, kort enggau pengawa salah.
“Nya alai, endang nyadi tanggung pengawa NUJM nentuka pengelikun sereta pengelantang pendiau raban pemberita dijaga manah awakka penerang semampai ulih disadung ngagai mensia mayuh,” ku iya.
Berebak enggau nya, iya ngelalau semua raban pemberita seruran bejimat maya bejalaika pengawa diri terus titihka SOP ke udah ditetapka perintah.
Nuju bala pemberita ke bisi kelai kena penyakit tu, sida dilalau lengkas beperesa ba sepital lalu titihka atur mesti kuarantin.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak