Peranak Sibu Jaya dilalau bejejaga, titihka SOP

SIBU: Penyakit Covid-19 ditemu bisi ngerekai ke Sibu Jaya enggau disadang bisi kluster baru tebantai nangkan Kluster Pasai.
Pekara tu dikenuku Chairman Opis Kaunsil Pelilih Menua Pesisir Sibu (MDLBS) Kaunsilor Sempurai Petrus Ngelai ba sebengkah penerang kemari.
“Penyampau PCR Covid-19 ti positif ba Sibu Jaya disadang nambah.
“ Sibu Jaya nya entara mengeri baru pemadu besai di Sarawak.
“Dipelaba lebih ari 30,000 peranak nguan menua nya enggau lebih ari 7,000 buah rumah tauka begunan di Sibu Jaya direjister nyadi reta ke berega.
“Nya alai, Sibu Jaya endang nyadi pemar besai bekaul kes positif Covid-19 berapa minggu ke deka datai.
“Kitai mesti bekerejasama nagang pengerekai Covid-19 tu,” ku Sempurai nyemetak madah.
Berindik ari nya, iya minta ti diau ba Sibu Jaya mesti nurun beperesa enti diasuh beperesa PCR Covid-19.
Ku Sempurai, peranak dikearap besabar enggau meri kerejasama ngagai polis enti sema Sibu Jaya diempang jalai enggau enda ulih mindah ke bukai.
“Nadai siku orang dikemendar pansut ari Sibu Jaya enti nadai bulih pemendar ari polis.
“Semua peranak Sibu Jaya mega mesti ngemeranka Atur Pengawa Standard (SOP).
“Diau jenuh aja ba rumah kelimpah pengawa begempuru enda dikemendar di Sibu Jaya,” terang iya.
Berebak enggau nya, Sempurai minta polis neritka atur baka ngeluarka kompaun kelimpah enda ibuh meri jaku tangkan ngagai sida ti terang ngelanggar atur enggau undang-undang Atur Mindah Betagang (PKP).
Kemari, siti pesan ari siku ke enda dikelala ngerembai madahka iya baru tembu baum begulai enggau Komiti Penyangga Penusah Bagi Menua Sibu (JPBBS), Dr Annuar Rapaee enggau Dr Teh Jo Hun madahka Covid-19 balat ngerekai enggau ngirauka ati di Sibu Jaya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak