Perintah nambahka palan kuarantin enggau kereban bantu enseput di Sibu

SIBU: Perintah nengeri deka nentuka vaksin Covid-19 ulih datai enggau jampat ba menua tu.
Kepala Menteri Datuk Patinggi Abang Johari Tun Openg madahka, pia mega perintah nengeri mega agi dalam pengawa nagang kes Covid-19 di Sibu.
Iya madahka vaksin Covid-19 chukup beguna enggau dipelabaka deka datai enda lama agi ke menua tu.
“Timpuh lima ngagai enam bulan tu pemadu beguna dalam nagang virus nya. Maya nya, kitai udah bisi vaksin.
“Vaksin ukai ubat, nya semina antibodi (dinding bulu) kitai ngelaban virus. Nya alai, kami deka nagang kes Covid-19 maya nya di Sarawak,” ku iya ba aum pemberita kemari.
Dulu ari nya, iya datai ningaka penerang bekaul kes Covid-19 di Sibu begulai enggau Komiti Penyangga Penusah Ngenyit Bagi Menua Sibu (JPBBS).
Iya madahka, meda gaya kes Covid-19 di Sibu majak nambah, pengawa nagang pengerekai penyakit nya endang patut dipejalai.
Ku iya, siti ari pekara ti patut diseruri iya nya numbuhka mayuh agi palan kuarantin di Sibu.
“Pengatur JPBBS Dr Annuar Rapaee deka ngiga palan ti deka diubah nyadi palan kuarantin ungkup pesakit ti berisiko baruh,” ku iya.
Tandu iya, perintah nengeri deka nanggung ungkus logistik ti diguna ba menua nya.
“Kebuah pia, maya tu kes positif Covid-19 ngerekai ba rumah panjai, sida mesti dibai ngagai palan kuarantin.
“Tang kitai napi penanggul logistik. Taja pia, kitai endang enggai pesakit tu diau ba rumah panjai laban nanggika iya ngerampit peranak rumah panjai ke bukai,” ku iya.
Iya madahka, entara pekara bukai ti patut diberi perati iya nya neritka adat enggau perengka pemun dalam negapka raban penerit adat.
Iya mega meretika raban polis di menua nya napi penanggul enda chukup tubuh.
Nya alai, iya nyemetak madahka, perintah nengeri deka ngaul kerejasama enggau piak polis, soldadu, soldadu wataniah enggau Rela dalam mutarka penanggul tu.
Abang Johari madahka komunikasyen entara raban penerit adat enggau raban ba rumah panjai tauka menua pesisir endang amat beguna nerangka pasal Covid-19.
“Covid-19 agi baru bagi sida, nya alai kitai mesti meri penerang ti ulih ditemu sida iya.
“Sekeda peranak rumah panjai ti bisi ngaga sekat pejalai enda tan bekurung dalam rumah, nya kebuah sida keluar ngena jalai chit ngusung kebun. Nya alai, komunikasyen amat beguna dikena nerangka ngagai sida iya,” ku iya.
Iya mega madahka perintah nengeri deka meri sepuluh buah mesin kereban dikena enseput ngagai Sepital Sibu.
Iya mega ngarapka mensia mayuh ulih meri kerejasama penuh, meretika enggau nitihka Atur Pengawa Standard (SOP) ti udah ditetapka.
“Enti kitai ngaga tu, kitai ulih mutarka penanggul tu ba Sibu enggau palan bukai,” ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak